Территориалон æвзарæн къамисты уæнгтæ бæрæг кæнынц алыхуызон ахуыргæнæндæттæ, куыстуæттæ æмæ организацитæ
Уæрæсейы Президенты æвзæрстыты агъоммæ Цæгат Ирыстоны цæуы ахсджиаг куыст. Территориалон æвзарæн къамисты уæнгтæ бæрæг кæнынц алыхуызон ахуыргæнæндæттæ, куыстуæттæ æмæ организацитæ. Аразынц фембæлдтытæ, цæмæй се ппæты дæр базонгæ кæной хъæлæс кæныны æппæт хъуыддæгтимæ. Ахæм фембæлдтытæ адæмæн фадат дæттынц æвзæрстыты тыххæй бæстондæр базонынæн. Фидараты Маринæ радзурдзæн бæлвырддæр.
Цæгат Ирыстоны æвзарæн къамисы минæвæрттæ фембæлдысты тхеквондойы Галуаны тренертимæ, æвзонг спортсментимæ æмæ сæ ныййарджытимæ. Къамисы сæрдар Моргуаты Жаннæ сын радзырдта æвзарæн кампанийы тыххæй. Уыимæ сбæлвырд кодта, курдиат раст бадæттæн куыд ис, уый, стæй ма радзырдта хъæлæс кæныны æппæт хуызты тыххæй. Алкæмæн дæр фадат уыд йæхи фарст раттынæн дæр.
Æвзарæн къамисы уæнгтæ ма фембæлдысты Цæгат Кавказы хæххон металлургон институты студенттимæ æмæ волонтертимæ. Хъæппæрисджын фæсивæд æххуыс кæндзысты, участокмæ чи рбацæудзæн, уыцы æвзарджытæн. Уæлдай æргом здахдзысты, æнæ искæйы ххуысæй йæ бон цæуын кæмæн нæу, ахæм адæммæ. Уымæй дарддæр ма искæмæ зындзинæдтæ куы сæвзæра, æвзарæн системæйæ спайда кæныны хъуыддаджы, уæд ахæм адæмæн дæр цæттæ уыдзысты баххуыс кæнынмæ.
Зæгъын хъæуы уый, æмæ æвзарæн къамисы минæвæрттæ ныридæгæн скодтой 90 ахæм фембæлды. Бабæрæг кодтой ахуыргæнæндæттæ, ведомствотæ æмæ куыстуæттæ. Къамисы сæрдар Моргуаты Жаннæ куыд загъта, афтæмæй ахæм мадзæлттæ арæзт цæуынц фыццаг хатт.
Уæрæсейы Президенты æвзæрстытæ цæудзысты æртæ боны 15-æм, 16-æм æмæ 17-æм мартъийы. Ахсджиаг у, цæмæй, хъæлæс кæныны бар кæмæ ис, нæ бæстæйы алы ахæм цæрæг дæр хорз зона æвзæрстыты æппæт хъуыддæгтæ дæр.
