Ныхас цыд территориты аивдзинадыл, ахуыргæнæндæтты бындурон цалцæгыл, медицинон æххуыс бакæныныл
Уæрæсейы Президенты исæнуаты Дзæуджыхъæуы, Сергей Меняйло фембæлд республикæйы цæрджытимæ. Ныхас цыд территориты аивдзинадыл, ахуыргæнæндæтты бындурон цалцæгыл, медицинон æххуыс бакæныныл. Дзуарыхъæуы цæрæг Абайты Муссæ республикæйы сæргълæууæгæн радзырдта, ацы сæрды йæ хæдзар кæй басыгъд, уый тыххæй. Ныртæккæ пенсиисæг йæ бинойнагимæ цæры рæстæгмæ цæрæнуаты. Сергей Меняйло фыццаг вице-премьер Атарты Георгийæн бабар кодта бынат бабæрæг кæнын, æмæ арæзтады гæнæнтæ фенын. Абайты бинонтæн баххуыс кæнын бабар кодтой финансты, стæй фæллойы æмæ социалон рæзты министрадтæн. Æххуыс бакæнын бабар кодта Скъиаты Фиалетæйы бинонтæн дæр. Уымæн дæр йæ хæдзар басыгъд. Раздольныйы цæрæг Любовь Лукьянова ракуырдта хъæуы скъола сцалцæг кæнын. Регионы разамонæг зæрдæ бавæрдта, ахуыргæнæндон 2026-æм азы федералон проектмæ гæсгæ кæй сцалцæг кæндзысты, уымæй. Ахæм куыст бакæндзысты Суададжы скъолайы æмæ Сунжæйы 2-æгæм рæвдауæндоны. Заводскойы цæрæг Цæллаты Зæлинæ ракуырдта Цæгат Ирыстоны педагогон колледжы цалцæджы тыххæй. Дигорайы цæрæг Тобойты Анжелæйы курдиатмæ гæсгæ та Дигорайы хъуамæ фæзына сквер. Объектыл схъæлæс кодтой цæрджытæ сæхæдæг. Мичуриныхъæуы ахæм ног сквер фæсындзæн сæрмагонд æфсæддон операцийы архайджыты номыл. Æрыдоны сæвæрдзысты сывæллæтты спортивон фæз. Ацы æмæ æндæр фарстатæ алыг кæнын Сергей Меняйло бабар кодта бæрнон кусджытæн.
