Уалдзæджы ралæудимæ кусæн рæстæг райдыдта фæндæгты службæтæн. Кæд ацы зымæг карз нæ уыд, уæддæр æндæгты уавæрыл фæзынд. Уыимæ ма ис, рæгæй зилинаг чи у, ахæм фæндæгтæ дæр.
Гайты Барис ныр дæс азæй фылдæр кусы æхсæнадон транспорты шофырæй. Куыд зæгъы, афтæмæй фæндæгтæ æнæмæнг хъæуы цалцæг кæнын, уæлдайдæр та зымæджы фæстæ. Ис ахæм бынæттæ, фæндаг тынг пырх кæм у, æмæ фæхъæуы æндæр маршрут равзарын.
Дзæуджыхъæуы асфальт фæндæгтæ сты 370 километры. Цалцæггæнын сын хъæуы се мбис.
Ацы аз горæты 27 уынджы бындуроной цалцæг кæндзысты. Ивдзысты фæндаджы уæллаг хай, къахвæндæгтæ, бордюртæ, стæй ма хæдзæрттæм бацæуæнтæ дæр».
Титовы, Коцойты Арсены, Ирыстойнаг, Лев Толстойы, Хетæгкаты Къостайы уынгтæ – бындурон цалцæг кæндзысты 15 километры бæрц. Сæ пайда кæныны рæстæг у 10 азæй фылдæр. Уыимæ ма сцалцæг кæндзысты ДЗæуджыхъæуы иннæ уынгтæ дæр.
Уаниты Сослан, Дзæуджыхъæуы администрацийы фæндæгты арæзтады æмæ цъæх фæлысты хайады хицауы хæдивæг: «Ног азмæ нæм и сбирæ фæндтæ, цæмæй нæ горæт фæрæсугъддæр уа. Республикæйы бюджетæй хъуамæ горæтæн радтой кæцыдæр хай. Уымæй нæ бон уыдзæн фæндæгтæ аразын. Фарон дæр нын, уыдонæй нæ бон сси 20 фæндагæй фылдæр барæвдз кæнын».
Фæндаггон службæтæ æппæт куыстытæ райдайдзысты, боныхъæд куы аива, уæд. Ныр та уал бæрæг кæнынц, цавæр организацитæ архайдзысты арæзтадыл, уый, стæй цæттæ кæнынц æппæт документтæ. Ног домæнтæм гæсгæ, куыстыты хæрзхъæддзинадæн ныр 5 азы дæргъы дзуапп дæтдзæн, чи сæ цалцæг кодта, уыцы организаци, йæхи хардзæй иуварс кæндзæн, цы лыггæнинаг фарстатæ дзы сæвзæра, уыдон.
Цалцæггæнæн куыстыты фæтк бæрæггонд у 1-æм ноябрмæ. Æппæт объекттæ дæр хъуамæ конд æрцæуой уыцы мгъуыдмæ. Уæвгæ, республикæйы бюджетæй фæндæгты арæзтадæн дихгонд æрцыд 1 миллиард æмæ 290 милуан сомы. Федералон субсидиты бæрц та уыдзæн 250 милуаны. Цалцæггæнæн куыстытæй дарддæр ма æхцатæ хардзгонд æрцæудзысты, раздæр цы фæндæгтæ райдыдтой арæзын, уыдоныл дæр – Мамысонмæ, Хъæрмæдоны рдæм фæндæгтæ, стæй Мæздæджы районмæ иувæрсты цæуæг фæндаг.
