Уалдзыгон донивылдтытæм сæхи иу мæйы бæрц цæттæ кæнынц регионты `хсæн хыздихгæнæн компанийы цæгатирыстойнаг филиалы кусджытæ дæр. Тæссаг уавæры ис Кировы районы
Ацы телыхъæды руаджы электрон тыхæй æххæст сты Елхоты 20 мин адæймагæй фылдæр. Уыимæ ма ацы дæлстанцæ нымад у уæлæмхасæныл дæр. Ома бахъуаджы сахат – цалцæггæн куыстыты, кæнæ æнæнхъæлæджы цауы рæстæг, уый фæрцы электрон тыхæй æххæстгонд цæудзæн Кировы районы сæйраг хъæу æнæхъæнæй дæр.
Улыбиаты Ибрагим, Кировы районы электрон телты куыстуаты сæйраг инженер: «Ныртæккæ райдыдта донивылдтыты рæстæг. Æмæ нæ телыхъæд та лæууы Терчы тæккæ астæу. Уый тыххæй æрбакодтам бульдозе, æмæ йын йæ бын хафы, доны цы хуыр ис, уымæй, цæмæй ма ахауа, доны бæрзæнд куы фæфылдæр уа, уæд. Уымæн æмæ адæм æнæ рухсæй баззайдзысты».
Ныртæккæ Терчы дон кæлы телыхъæдæн йæ бынмæ. Цы бульдозер дзы кусы, уый фыццаджыдæр архайы, цæмæй дон иувæрсты кæла. Аразынц ын дыууæ цæуæны, телыхъæды галиу æмæ рахиз фæрсты. Йæ бын та йын ныффидар кæндзысты бетонæй. Елхоты цæрджытæ куыд зæгъынц, афтæмæй регионты `хсæн хыздихгæнæн компанийы цæгатирыстойнаг филиалы кусджытæ арæх фæбæлвырд кæнынц уавæр. Уымæн æмæ донивылды рæстæг дон ссæуы 1 метры бæрзæндмæ дæр.
Болотаты Гия, Елхоты цæрæг: «Арæх цæуынц электриктæ æмæ сæм кæсынц, æмæ хур бон ницы, фæлæ къæвдабон нæм арæх æрбацæуынц электриктæ».
Уæвгæ, тæссаг уавæры республикæйы ис 70 ахæм объекты. Апрелæй августмæ регионты `хсæн хыздихгæнæн компанийы цæгатирыстойнаг филиалы кусджытæ фæкæнынц фидаргæнæн куыстытæ.
Ахæм куыстытæ энергетиктæ кæндзысты республикæйы иннæ районты дæр. Мониторингы хатдзæгтæм гæсгæ æвæстиатæй ныффидар кæнын хъæуы 3 телыхъæды Æрыдоны районы. Куыстытæ райдайдзысты хæстæгдæр рæстæг.
Гугкаты Иринæ
