Строительный уынджы цæрджыты ныхæстæм гæсгæ, доны æмвæзад схизы 10 сантиметры онг
Нæ дзы фистæгæй ацæуæн нæй, нæ – машинæйæ. Уарынты рæстæг ахæм зындзинæдтæ февзарынц Михайловскæйы уынгтæй иуы цæрджытæ. Суанг дзы цъымарайы цæугæдон дæр февзæры. Уæд адæмæн æндæр гæнæн нæ вæййы, æмæ сæ фæндаг акæнынц Заводскойы поселочы уылты. Фарста лыггонд нæ цыди, æмæ бынæттон цæрджытæ сæ хъаст бахастой Адæмон фронты регионалон æххæстгæнæн комитетмæ. Æхсæнадон кусджытæ бынат бабæрæг кодтой, æмæ цы уынаффæ рахастой, уый тыххæй радзурдзæн Фидараты Маринæ.
Уарынты рæстæг Михайловскæйы уынгтæй иу свæййы æцæг цæугæдоны хуызæн. Строительный уынджы цæрджыты ныхæстæм гæсгæ, доны æмвæзад схизы 10 сантиметры онг. Рипа Захарян ам цæры ныр 30 азы онг. Æмæ куыд радзырдта, афтæмæй ацы фарста сæвзæрд 8 азы размæ. Æмæ-иу кæд фыццæгты хуымæтæг цъымаратæй тыхстысты, уæд фæстæдæр та зынгæ фæфылдæр сты. Ритæ йæ сыхæгтимæ сæ хъаст бахастой Горæтгæрон районы администрацимæ, фæлæ фарста афтæдæр лыггонд не рцыд. Хæрзæрæджы та Михайловскæйы цæрджытæ бадзырдтой Адæмон фронты регионалон хайадмæ, æмæ сын радзырдтой сæ тыхстдзинады тыххæй.
Цæрджыты тыхст фехъуыстой. Æхсæнадон кусджытæ фембæлдысты бынæттон цæрджытимæ æмæ аныхас кодтой Горæтгæрон районы администрацийы минæвæрттимæ. Ацы фæндаг иу кæны дыууæ поселочы. Уымæй дарддæр ам ис дуканитæ æмæ культурæйы Хæдзар. Уарынты рæстæг хъыгдард æййафынц канд фистæгæйцæуджытæ нæ, фæлæ ма шофыртæ дæр. Сæ машинæтыл цыма ленк фæкæнынц, афтæ.
Нырма уал зын зæгъæн у, уынгмæ бæстон кæд базилдзысты, уый. Фæлæ Адæмон фронты минæвæрттæ зæрдæ бавæрдтой, ацы уаццагмæ бæстон цæсьдард кæй цæудзæн, уымæй.
Адæмон фронты регионалон æххæстгæнæн комитеты разамонæг Гæлиты Климы ныхæстæм гæсгæ, ацы къуыри хъуамæ арæзт æрцæуа сæрмагонд æмбырд. Уым специалисттæ æрныхас кæндзысты æппæт хъуыддæгтыл, æмæ рахæсдзысты уынаффæ, фарста куыд хуыздæр алыг кæнæн ис, уый фæдыл.
