Йæ автортæ сты Æхполæтты Æхсарбег æмæ Ульяна Гончарова. Сты бинонтæ. Иумæ цæрынц 20 азæй фылдæр
Уарзондзинад адæммæ, Ирыстонмæ æмæ алфамблай дунемæ. Ууыл дзуры равдыст «Бинонты альбом». Экспозици равæрдтой Цæгат Кавказы хæххон-металлургон институты. Йæ автортæ сты Æхполæтты Æхсарбег æмæ Ульяна Гончарова. Сты бинонтæ. Иумæ цæрынц 20 азæй фылдæр. Кусынц алыхуызон жанрты, пайда кæнынц нывкæнынады бирæ техникæтæй. Сæ куыстытæ баиу кодтой иу тематикон равдысты. Арæзт æрцыд бинонты азы фæлгæты.
Æппæты зынаргъдæр куыстытæ. Нывгонд сыл сты сæ хиуæттæ. Сæ цардæй фылдæр кæй уарзынц, уыцы адæм. Æхсарбег æмæ Ульянæ 20 азы дæргъы сæ куыстытæй иу æмæ дыууæ иумæйаг равдысты нæ сарæзтой, фæлæ ацы равдыст у сæрмагонд. Цы нывтæй арæзт у, уыдон уæй нæ кæнынц, конкурсты архайынмæ дæр сæ нæ бацæттæ кодтой. Сæ нысан у – дунейæн равдисын сæ бинонты хæзнатæ.
Алыхуызон цæстæнгас æмæ удыхъæд, фæлæ иухуызон хæзнатæ æмæ æнкъарæнтæ æвдисæг нывтæ. Æхсарбег æмæ Ульянæ куыд зæгъынц, уымæ гæсгæ сын æнцон у иумæ иу куыст кæнын. Ульянæйæн Æхсарбег у йæ ныфс, Æхсарбегæн Ульянæ та – йæ сфæлдыстадмæ хуыздæр разæнгардгæнæг.
Равдысты цалдæр нывыл фенæн ис сæ иунæг чызг Марияйы сурæт. Йæ цæстытæ цæхæртæ кæм калынц, уыцы куыстытæн ныййарджытæ кæнынц уæлдай аргъ. Æхсарбеджы ныхæстæм гæсгæ хи сывæллонмæ уарзондзинад у уæлдай зынаргъ æнкъарæн, ницæимæ йæ ис абарæн.
Равдысты сæйраг темæ у уарзондзинад. Æрмæст хиуæттæм æмæ Ирыстонмæ нæ, фæлæ алфамблай дунемæ. Æхполæтты Æхсарбег æмæ Ульяна Гончаровайы бинонты равдыст Ирыстонæй уæлдай адæм федтой Мæскуыйы нациты хæдзары æмæ адæмты ахастдзинæдты институты дæр. Хæххон металлургон институты равдыстмæ æрбацæуæн уыдзæн 6 декабры онг. Уый фæстæ та йæ равæрдзысты ЦИПУ-йы.
