Шиномонтажгæнæн æрмадзтæ ацафон фæкусынц карздæр фæткмæ гæсгæ, æмæ сидынц машинæты хицæуттæм, цæмæй ацы хъуыддагмæ бæрнондæр цæстæй кæсой, уый тыххæй
Уазæлтты ралæудимæ ахсджиаг вæййы машинæтæм базилын. Сæрдыгон цæлхытæ зымæгонмæ раивгæйæ шофыртæ æмæ фистæгæйцæуджытæ вæййынц æдасдæр. Шиномонтажгæнæн æрмадзтæ ацафон фæкусынц карздæр фæткмæ гæсгæ, æмæ сидынц машинæты хицæуттæм, цæмæй ацы хъуыддагмæ бæрнондæр цæстæй кæсой, уый тыххæй. Горæты уынгтыл æрзылди не сфæлдыстадон къорд, æмæ бæлвырддæр хабæрттæ радзурдзæн Гуытъиаты Алинæ.
Георгий Бекаури шофыр нырма дыууæ азы йедтæмæ нæу. Фæлæ уæддæр æмбары, фæндаггон æдасдзинад æппæты сæйрагдæр кæй у, уый. Куы рбауазал вæййы, уæд лæппу фыццаджыдæр йæ машинæйы сæрдыгон цæлхытæ раивы зымæгонтæй. Фæлæ хъыгагæн бирæтæ уыцы фарстамæ кæсынц куыдфæндыйы цæстæй. Зымæгон афон райдыдта 15 ноябыры. Фæлæ шофыртæй бирæтæ сæ машинæты цæлхытæ раивынц. æрмæстдæр куы æрбауазал вæййы, æмæ фæндаг куы сбырынцъаг вæййы, уæд.
Зымæг куы рбалæууы, уæд автосервистæм радтæ ныддаргъ вæййынц. Хæдарцаты Аслан у цæлхыты мастер æмæ куыд зæгъы, афтæмæй фыццаг мит бирæ шофырты раст къуырццæвæнмæ батæры. Ныр та ма сырæзт, сæ цæлхытæ сæрмагонд маркировкæтимæ шинæтæй раивын кæй фæнды, уыцы адæмы нымæц.
Цæлхытыл зымæгон резинæ кæй нæй, уый тыххæй шофыр мыййаг ивар нæ бафиддзæн, фæлæ таможняйы цæдисы техникон регламентмæ гæсгæ, хъуамæ алы машинæйыл дæр уой, æппынкъаддæр декабырæй февралмæ.
Автосервисты кусджытæ шофыртæм сидынц, цæмæй цæст дарой боныхъæдмæ. Фæлæ сын уæддæр амонынц, цæмæй ма нхъæлмæ кæсой уазæлттæм, æмæ афойнадыл батыхсой сæ æдасдзинадыл.
