Уыцы хабарыл физкультурæйы ахуыргæнджытæ æхсызгонæй сæмбæлысты. Сæ хъуыдымæ гæсгæ физкультурæйæ фылдæр уроктæ ахъаз уыдзысты сывæллæтты æнæниздзинад фæхуыздæр æмæ фæфидардæр кæнынæн.
Сæрмагонд уынаффæ кæд фыст æрцыд, уæддæр уал «Фæллой æмæ хъахъхъæнынадмæ цæттæдзинад»-ы ног нормæтæ бæрæггонд не сты. Уымæ гæсгæ ахуыргæнджытæ кусынц зæронд фæткмæ гæсгæ. Бирæ регионты уал кусынц фæлварæны хуызы. Цæгат Ирыстоны фæсивæды хъуыддæгты, физкультурæ æмæ спорты министрады дæр æнхъæлмæ кæсынц бæлвырд уынаффæтæм. Зæгъæн ис æрмæстдæр уый, æмæ ног спортивон нормативтæ бæрæг кæндзысты 11 къордмæ гæсгæ 6 азæй – 60 азы онг. Скъоладзаутæ та архайдзысты хуыздæр бæрæггæнæгтæ равдисыныл. Уымæн æмæ ног домæнтæм гæсгæ уæлдæр скъолатæм цæугæйæ, каст цæудзæн физкультурæйæ бæрæггæнæм.
Указ сæххæст кæнынмæ цæттæ сты ДОСААФ-ы регионалон хайады дæр. «Фæллой æмæ хъахъхъæнынадмæ цæттæдзинад»-ы кæцыдæр нормативтæ, зæгъæм мысан æхсынæй, дæтдзысты ДОСААФ-ы.
