Архайдзысты дзы Цæгат æмæ Хуссар Ирыстонæй бæстæйы алы ахуыргæнæндæтты чи ахуыр кæны, уыцы студенттæ
Урсдоны 6-æй 9-æм августмæ цæудзæн студентон сæрдыгон æмбырд «Æрыгон». Архайдзысты дзы Цæгат æмæ Хуссар Ирыстонæй бæстæйы алы ахуыргæнæндæтты чи ахуыр кæны, уыцы студенттæ. Арæзт сын цæудзысты лекцитæ, тренингтæ, цымыдисаг фембæлдтытæ. Ныртæккæ мадзалмæ ахадгæйæ цæттæ кæнынц. Бæлвырдæдр радзурдзæн Хъайтмазты Дзерассæ.
Ацы фæсивæд пансионат «Урсдон»-ы æрæмбырд сты ахсджиаг нысанимæ. Алы уæлдæр ахуыргæнæндæтты студенттæ суыдзысты Ирыстоны фыццаг ахæм хуызы студентон æмбырды волонтертæ. Республикæйы сæргълæууæджы æмæ Хицауады администрацийы разамонæг Гобеты Ибрагим сарæзта инструктаж, куыст куыд арæзт цæудзæн, уый фæдыл.
6-æй 9-æм августмæ Дыгуры районы уыдзæн студентон сæрдыгон æмбырд «Æрыгон». Сæмбырд кæндзæн 300 студентæй фылдæры – Цæгат æмæ Хуссар Ирыстонæй бæстæйы алы уæлдæр ахуыргæнæндæтты чи ахуыр кæны, уыдоны. Хицауады уæнгтæ пансионат «Урсдон» бабæрæг кодтой, цæмæй аргъ скæной лагерь уазджытыл сæмбæлынмæ куыд цæттæ у, уый.
Хæрæндоны фаг бынæттæ уыдзæн, хæдзæртты цæрынæн цавæр уавæртæ ис, сценæ куыд саив кæнын хъæуы – æппæт ацы фарстатыл бынаты æрныхас кодтой профилон ведомтсвæты разамонджытæ. Студентон æмбырд хъуамæ афтæ арæзт æрцæуа, цæмæй фæсивæды бафæнда æрыздæхын.
Æмбырды программæйы уыдзæн рухстауæн лекцитæ æмæ тренингтæ, республикæйы сæйрагдæр къабæзты райрæзты фæдыл проектон куысты элементтæ, культурæйы архайджытимæ, спортсментимæ фембæлдтытæ. Архайджытæн уыдзæн, Цæгат Ирыстоны сæргълæууæг Сергей Меняйлоимæ æмæ зындгонд уæрæсейаг эксперттимæ аныхас кæныны фадат.
Райгуырæн зæххы атмосферæ банкъарын æмæ студентон фæсивæды æнгом кæнын, регион ногырдыгæй раргом кæнын – уый у æмбырд «Æрыгон»-ы нысанты чысыл хай.
