Знон кафт æмæ зардимæ бæрæгбон арæзт æрцыд станицæ Николаевскæйы. Культурæйы хæдзары цурмæ æрбацыдсты хистæртæ æмæ сывæллæттæ. Хъæлдзæг бæрæгбонæн æвдисæн уыдысты
Урсы къуырийы фидауц – лауызтæ. Чысыл хур алы хæдзары дæр. Ацы бонты чырыстон адæм бæрæг кæнынц цæрвкъахæнтæ. Йæ сæйраг символ сты лауызтæ æмæ сæ барстой хуримæ, ома, афтæ тымбыл æмæ хъарм. Ацы бонтæй-иу райдыдтой æнхъæлмæ кæсын уалдзæгмæ.
Адæмы хъуыдымæ гæсгæ, ацы бæрæгбон куыд арвитай, афтæ ацæудзæн æнæхъæн афæдз дæр. Уый зонгæйæ, Николаевскæйы станицæйы сарæзтой стыр бæрæгбон.
Станицæйы цæрджытæн бæрæгбоны арфæтæ ракæнмæ æрбацыдысты республикæйы национ ахастдзинæдты фарстаты фæдыл министр Фрайты Сослан, Дзæуджыхъæуы сфæлдыстадон коллективтæ, Теркаг хъазахъхъæгты хор «Терцы», хъазахъхъаг адæмон зарджыты ансамбль «Сударушка».
Хъæлдзæг зарджыты æмæ музыкæйы зæлтæ дардтыл хъуыстысты. Адæм зæрдиагæй цыдысты хъæуы сæйраг фæзмæ æмæ бæрæгбон апарахат.
Ацы къуыри стыр комбæттæны размæ у фæстаг. Бинонтæ сисынц сæрмагонд царв, хъæбæр цыхт æмæ къуырийы дæргъы фæкæнынц лауызтæ æмæ уæлибæхтæ.
Ирыстоны цæрджытæ бæрæгбонмæ рагагъоммæ фæцæттæ кæнынц. Æфсинтæ та сæхи куыд хуыздæрæй равдисой, ууыл архайынц æмæ цæттæ кæнынц лауызтæ дзидзаимæ, кæсагимæ, гагадыргътимæ, адджинæгтимæ æмæ æндæртæ. Хуыцаубоны та сæвæрынц бæрæгбоны фынгтæ, уæвгæ йæ алчидæр зоны – уый фæстæ райдайы комдарæн рæстæг æмæ дзидза хæрæн нал уыдзæн.
Æмæ ма иу домæн – æнкъард æмæ мæсты кæнæн нæй. Урс къуырийы кæрон та æнæмæнг хъæуы се ппæтимæ дæр бафидауын æмæ хатыр ракурын, кæд искæй зæрдæхудты бацыдтæн, зæгъгæ.
Зыхъуаты Жаннæ
