Радон сезон райдыдта Лермонтовы драмæ «Маскарад»-æй
Евгений Вахтанговы номыл Уырыссаг Академион театр йæ дуæрттæ байгом кодта 152-æм хатт. Радон сезон райдыдта Лермонтовы драмæ «Маскарад»-æй. Аивадуарзджыты дисы бафтыдтой хъайтарты сурæттæ, сæ уæлæдарæс æмæ хореографи. Ацы мæй ма театрдзаутæ фендзысты цалдæр премьерæйы: «Приличные девушки», «Тетки в Законе», «Любовные игры Сары и Элеоноры» стæй сывæллæттæн та «Щелкунчик». Бæлвырддæр хабæрттæ радзурдзæн Фидараты Маринæ.
152 азы размæ куыд уыди, афтæ ацы хатт дæр Евгений Вахтанговы номыл Академион Уырыссаг театр йæ радон сезон байгом кодта Лермонтовы драмæ «Маскарад»-æй. Æмæ та ацы хатт дæр театры къух бакæнæн нæй.
152-æм театралон сезон гом æрцыд! Академион Уырыссаг театр æгасцуай загъта аивадуарзджытæн. «Маскарад» у цымыдисаг истори, йæхи сусæгдзинæдтимæ æмæ алыхуызон миниуджытимæ. Иуырдыгæй æгæрон æууæнкдзинад, иннæрдыгæй та сусæг хахуыртæ. Театрдзаутæ арф банкъардтой хъайтарты архайд, сæ уæлæдарæс æмæ хореографи. Хатгай сæ фезмæлд ныхæстæй сæйрагдæр фæвæййы.
Куыд ма загътам, афтæмæй драмæ «Маскарад»-æй байгом æппæты фыццаг театралон сезон дæр. Ирыстойнаг аивадуарзджытæ кæй бауарзтой, уыцы постановкæ фенынмæ æрбацыдысты мæскуыйаг театралтæ дæр.
Уырыссаг театры труппæйæн сентябрь сфæлдыстадон цаутæй уыд хъæздыг. Актертæ архайдтой фестиваль «Русская сцена» Махачкалайы. Уым равдыстой спектакль «Сотворившая чудо». Новочеркасскы фестивалы та Наталья Серегина райста хæрзиуæг, куыд сылгоймаджы хуыздæр сурæт саразаг спектакль «Лес»-ы. Дыууæвæрсыг гастрольтæ æххæст кæнгæйæ, не мзæххон артисттæ уыдысты Тверы. Сæ драмæйы академион театры труппæ та йæ постановкæтæй æнæхъæн сентябрь рухс кодта ирыстойнаг аивадуарзджыты зæрдæтæ.
Уæвгæ, аивады сæйраг нысантæм бирæ ахсджиаг хъуыддæгтæ хауы. Сæ иу – хæлардзинад æмæ рухс æнкъарæнтæ кæддæриддæр хъуамæ тых кæной талынг хъуыддæгтыл. Уымæ гæсгæ театрæн ныртæккæ фæзынд уæлæмхасæн хæстæ æмæ нысантæ.
Ацы мæй аивадуарзджытæ фендзысты, ныридæгæн кæй бауарзтой, уыцы постановкæтæ: «Приличные девушки», «Тетки в Законе», «Любовные игры Сары и Элеоноры». Уымæй дарддæр цæттæ кæндзысты премьерæтæ: Лоркæйы «Дом Бернарды Альбы» æмæ Буогаковы «Иван Васильевич». Æппæты кæстæр театралтæн та балæвар кæндзысты Гофманы аргъæутты мотивтæм гæсгæ фыст «Щелкунчикы».
