Экспедицийы архайынц 15 æрыгон адæймаджы Уæрæсейы алы регионтæй
Уырыссаг Георгафион æхсæнады волонтертæ бабæрæг кодтой Дыгургом. Экспедицийы архайынц 15 æрыгон адæймаджы Уæрæсейы алы регионтæй. Се ппæт дæр сты медиакъабазы специалисттæ. Сæ сæйраг хæс у – Национ парк «Алани»-йы тыххæй фылдæр æрмæг сæмбырд кæнын. Цæмæй рæсугъд хуызтæ сисой, уый тыххæй къамисджытæ нæ тæрсынц хæхтæм æмæ къæдзæхтæм бырын. Уыцы-иу рæстæг съемкæтæ кæнынц квадрокоптертæй. Уымæй дарддæр рæсугъд æрмæг сисгæйæ ма лæппутæ æмæ чызджытæ æмбырд кæнынц ацы бынæтты историтæ æмæ таурæгътæ. Ныхас кæнынц бынæттон цæрджытимæ. Цы сæмбырд кæной, æппæт уыцы æрмæг хаст æрцæудзæн хицæн альбоммæ, æмæ йæ равдисдзысты Национ парчы стæй Уырыссаг Географион Æхсæнады ресусрты. Фæлæ уый уыдзæн фæстæдæр. Ныртæккæ та волонтертæ онлайн-бастдзинады фæрцы социалон хызты равæрынц къамтæ, видеоæрмæг, стæй фыссынц се нкъарæнтæ. Ахæм экспедицитæ Аланимæ арæзт цæудзысты алы аз дæр. Сæ сæйрагдæр нысан у – канд туристты ргом не здахын, фæлæ ма специалистты ргом дæр. Цæмæй иумæйаг хъарутæй хъахъхъæд æрцæуой ацы уникалон территоритæ.
