Поэмæ «Руслан æмæ Людмилæ» сценæмæ рахастой цымыдисаг аудиовизуалон равдысты хуызы
Евгений Вахтанговы номыл Академион Уырыссаг театры уыд мультимедион концерт «Пушкины аргъæуттæ». Поэмæ «Руслан æмæ Людмилæ» сценæмæ рахастой цымыдисаг аудиовизуалон равдысты хуызы. Нывгæнæг-иллюстратор Саулаты Сергей цы нывтæ скодта, уыдоны фæрцы аивадуарзджытæ банкъардтой аргъауы алæмæты тæваг. Ходы Оледжы разамындæй национ инструментты оркестр «Ирыстон» ацагъдта Михаил Глинкæйы уацмыстæй скъуыддзæгтæ. Пушкины аргъау кастысты 2 æвзагыл – уырыссагыл æмæ ироныл. «Руслан æмæ Людмилæ» ирон æвзагмæ фыццаг хатт тæлмацгонд æрцыд. Ацы хъуыддаг сæххæст кодта Баситы Зæлинæ. Кастысты йæ Ирыстоны æппæт театрты зындгонд артисттæ. Концерты режиссер – Хуссар Ирыстоны аивæдты сгуыхт архайæг Дзудцаты Тамерлан. Уæ зæрдыл уын æрлæууын кæндзыстæм, проект «Пушкины аргъæуттæ» у культурон хъæппæристы президентон фонды грантон конкурсы уæлахиздзау.
