Кинолентæ дзурæг у зындгонд театралон режиссеры хæдзар сног кæнныл
Мæскуыйы, Евгений Вахтанговы Театры ног сценæйы ацыд Дзæуджыхъæуы Вахтанговы хæдзар сног кæныны тыххæй документалон кинонывтæ «Вахтанговы хæдзар. Реставраци куыд аивад»-ы премьерæ. Йæ автор у Золойты Фатимæ. Кинолентæ дзурæг у зындгонд театралон режиссеры хæдзар сног кæнныл. Автор ирдæй равдыстой арæзтады фыццаг хуыз бахъахъхъæныныл специалисттæ куыд архæдтой, уый æппæт къæпхæнтæ дæр. Кинонывы ныхас цæуы реставрацион компанийы æвæллайгæ архайдыл, æмæ уникалон проекты ахсджиагдзинадыл. Бæлвырддæр премьерæйы тыххæй радзурдзæн Сосранты Жаннæ.
Золойты Фатимæйы зæрдиаг куыстæн – æмбæлгæ аргъ. Вахтанговы хæдзарыл куыстыты цыдимæ баст киноновыл режиссер бацархайдта биноныгæй. Æртæ азмæ реставратортæн бастыст зындгонд режиссеры хæдзарæй саразын аивадон уацмыс, раздахын ын йæ раздæры хуыз. Цалынмæ специалисттæ агуырдтой дзуаппытæ сæ фæрстытæн, уæдмæ камерæ та бæрæг кодта аразджыты архайд.
«Вахтанговы хæдзар. Реставраци куыд аивад» – киноныв бирæты базонгæ кодта Евгений Вахтангов Дзæуджыхъæуы куы цард, уыцы рæстæгæй ист цаутимæ. Йæ саразыны хъуыды фæзынд мæскуыйаг театры директор Кирилл Крокмæ. Уый æрæмбырд кодта дæсныдæр специалистты, кæцытæн бантыст бæстыхайы историон бакаст сног кæнын. Кинонывы хъайтартæ систы театры артисттæ æмæ Паддзахадон хицаудзинады минæвæрттæ.
Кино исæн къордæн ахсджиаг уыд, реставраторты куысты алы фæзилæн дæр фæбæрæг кæнын, ацахсын. Уæвгæ цы арæзтадон куыстуаты минæвæрттæ йыл архайдта, уыдонæн ай фыццаг объект нæу, фæлæ Вахтанговы хæдзары рацарæзтыл кусгæйæ бахъуыд ног хъуыддæгтæй пайда кæнын.
Документалон ныв «Вахтанговы хæдзар. Реставраци куыд аивад» премьерæйы уыд Цæгат Ирыстоны сенатор Виталий Назаренко, Уæрæсейы Президенты цур республикæйы минæвары хæдивæг Дзасохты Тамерлан, Вахтанговы номыл театры артисттæ, стæй йæ хæстæджытæ. Рæхджы киноныв фенæн уыдзæн алкæйы бон дæр, зæгъы йæ режиссер Золойты Фатимæ.
