Йæ автортæ Александр Мягченков æмæ Марина Меркулова æртæ азы лæмбынæг кастысты егъау проектмæ
«Путь домой. Вахтанговские хроники». Театралон фестиваль кæронмæ æрхæццæ, фæлæ йæ программæ æххæст кæнгæйæ, къуырийы дæргъы цыдысты алыхуызон цымыдисаг æмæ ирд мадзæлттæ. Сæ иу – документалон кинонывы презентаци. Йæ автортæ Александр Мягченков æмæ Марина Меркулова æртæ азы лæмбынæг кастысты егъау проектмæ. Бæлвырддæр та – Евгений Вахтангов кæм райгуырд, уыцы хæдзар сног кæныны хъуыддагмæ. Фидæны зындгонд режиссерыл цыди æрмæстдæр 17 азы, Мæскуымæ куы атырныдта, уæд. Йæ фæндтæ æмæ бæллицтæ баст уыдысты Мæскуыйы йæхи театр саразынимæ. Йæ райгуырæн хæдзар та дæсгай азты дæргъы лæууыд Дзæуджыхъæуы астæу, æмæ азты цыдимæ заууатмæ цыди. Цалынмæ Вахтанговы номыл театры нæ разынд цымыдисаг хъæппæрис – уыцы хæдзар балхæнын, æмæ дзы музейы саразын. Уыимæ канд музей нæ, фæлæ культурон центр æмæ театры филиал. Евгений Вахтанговы хæдзар равæрдтой ВДНХ-йы равдыст-форум «Уæрæсейы». Куыд нæ регионы æнтыстдзинæдтæй иу, афтæ. Документалон кинонывы та аивадуарзджытæ уынынц уникалон кадртæ. Ирдæй дзы æвдыст цæуы – цæрæн хæдзарæй культурон цыртдзæвæн арæзт куыд æрцыд, уый. Уыцы цыртдзæвæн у зындгонд режиссеры æмæ культурон дуджы æвдисæн. Арæзт та æрцыд йæ ахуыргæнинæгты къухтæй. Киноныв «Путь домой. Вахтанговские хроники» цалдæр хатты сси алыхуызон фестивальты архайæг æмæ 7 хатты рамбылдта гран-при.
