Фыссæг-сатирик у бирæ советон артистты монологты автор
Вахтанговы хæдзары уыд Лион Измайловы сфæлдыстадон изæр. Фыссæг-сатирик у бирæ советон артистты монологты автор. Преми «Золотой теленок»-ы 3 хатты лауреат. Сывæллæтты уарзон киножурнал «Ералаш»-ы æппæты фыццаг сюжеты автор дæр уыд Лион Измайлов. Йæ хъазæн ныхæстæй адæм парахатæй пайда кæнынц æрвылбоны царды. Уымæн æмæ йе сфæлдыстады зынгæ бынат ахсынц цардæй ист нывтæ. Дзæуджыхъæуы аивадуарзджытæ фыссæг-сатирикыл æхсызгонæй сæмбæлдысты. Бæлвырддæр радзурдзæн Хъайтмазты Дзерассæ.
Ахæм историтæ æрхъуыды кæны цард, Лион Измайлов та сæ бафиппайы. Ацы изæр Вахтанговы хæдзары уазджытæн æнæмæнг уыд цымыдисаг. Юмористон миниатюрæтæ, цардæй ист нывтæ, хъæлдзæг историтæ йе сфæлдыстадон биографийæ – фыссæг-сатирикимæ худтис æнæхъæн зал. Уымæн æмæ юморæн царды кæддæриддæр хъуамæ уа бынат.
Мæскуыйы авиацион институтæй «Золотой теленок»-ы 3 премийы онг. Ахæм цардвæндаг ын цыма рагагъоммæ нысангонд уыд. Лион Измайлов йæхæдæг куыд зæгъы, афтæмæй адæмы амондæн авиацийы иу бон дæр нæ бакуыста. Фæлæ, зæгъын хъæуы уый дæр, æмæ сæ амондæн кæддæр рацыд сценæмæ æмæ ныры онг аивадуарзджыты зæрдæтæ хъæлдзæг кæны.
Йæ радзырдтимæ æмæ миниатюрæтимæ сценæмæ рацæуынц зындгонд артисттæ – Евгений Петросян, Геннадий Хазанов, Владимир Винокур, Клара Новикова… Хуымæтæг царды бафиппайы, иннæтæ цы нæ уынынц, уый, æмæ уыцы историтæ свæййынц юморы уацфысты бындур.
Дзæуджыхъæуы аивадуарзджытæ сатирикыл æхсызгонæй сæмбæлдысты. Фыссæг та йæхæдæг базонгæ республикæимæ, æмæ куыд загъта, афтæмæй раргом кодта, Ирыстонимæ йын кæй ис æнæзынгæ бастдзинад.
Æнæмæнг, Лион Измайловы сфæлдыстады фæзындзæн Дзæуджыхъæуы цардæй ист юмористон миниатюрæтæ дæр. Уымæн æмæ фыссæг дарддæр алцыдæр фиппайы æмæ йæ аивадæй адæмы чысыл амондджындæр кæны.
