Ацы цаумæ канд бынæттон цæрджытæ не нхъæлмæ кастысты, фæлæ ма сыхаг хъæуты минæвæрттæ дæр
Мæздæджы районы Винограднæйы хъæуы бындурон цалцæджы фæстæ байгом кодтой амбулатори. Ацы цаумæ канд бынæттон цæрджытæ не нхъæлмæ кастысты, фæлæ ма сыхаг хъæуты минæвæрттæ дæр. Медицинон куыстуаты ног уавæрты æмæ лæггæдты тыххæй бæстондæр радзурдзæн Фидараты Маринæ.
Винограднæйы хъæуы амбулаторийыл 120 азæй фылдæр цæуы. Æмæ дзы уыцы мгъуыдмæ фыццаг хатт æрцыд бындурон цалцæг. Терапевт Галуанты Аксанæ ам кусы 6 азæй фылдæр, сæрмагонд программæ «Хъæуккаг дохтыр» æххæст кæнгæйæ. Йæхæдæг куыд радзырдта, афтæмæй ног уавæртыл тынг цин кæнынц, уымæн æмæ раздæры гæнæнтимæ зынгæ хицæн кæнынц.
Амбулатори байгом кæныны кадджын мадзалы архайдтой республикæйы æнæниздзинадхъахъхъæнынады министр Тебиаты Сослан, Мæздæджы районы сæргълæууæг Гугиты Геннадий æмæ районы рынчындоны сæйраг дохтыр Бузойты Азæмæт. Профилон министр куыд загъта, афтæмæй медицинон-санитарон æххуысы лæггæдтæ нæ регионы лæууынц фыццаг бынаты, стæй сæм цæуы лæмбынæг цæстдард.
Амбулаторийы кусынц терапевт, педиатр, хирург, стоматолог, оторинолоринголог. Ам ис хи лаборатори дæр. Медицинон куыстуат æххæстæй сифтонг кодтой сæрмагонд техникæйæ. Ноггонд амбулаторийæн аргъ скодтой бынæттон цæрджытæ дæр.
Хæстæгдæр рæстæг ма ам байгом уыдзæн афтек дæр. Амбулатори лæггад кæндзæн 6 хъæуы цæрджытæн. Нырæй фæстæмæ адæмы районы центрмæ цæуын нал хъæудзæн, цæмæй æмбæлгæ медицинон æххуыс райсой, уый тыххæй. Зæгъдзыстæм ма уый дæр, æмæ объекты бындурон цалцæг ацыд, национ проект «Æнæниздзинадхъахъхъæнынад» æххæст кæнгæйæ.
