Афтæмæй цалдæр мæйæн райстой хостæ сæрмагондæй медицинон куыстуæттæн æмæ рынчынты хæдзары дзæбæх кæнынæн
Антибиотиктæ æмæ вирусы ныхмæ препараттæ. Коронавирус дзæбæх кæнынæн алцыдæр ис «Осфарммедтех»-ы скълады. Уæвгæ ныртæккæ вирусы миниуджытæ ивынц, уымæ гæсгæ йæ дзæбæх кæныны мадзæлттæ дæр хицæн кæнын райдыдтой. Медицинон скълад рæстæгæй-рæстæгмæ ифтонггонд цæуы æмбæлгæ хостæй. Цух сæ не ййафынц. Томайты Батраз радзурдзæн бæлвырддæр.
Вирусы ныхмæ хостæ, туг тæнæгдæр кæнæг æмæ ма æндæр хъæугæ препараттæ ссарæн ис «Осфарммедтех»-ы скълады. Организацийы разамонæг Гергиты Зæлинæ куыд радзырдта, афтæмæй цалдæр мæйæн райстой хостæ сæрмагондæй медицинон куыстуæттæн æмæ рынчынты хæдзары дзæбæх кæнынæн.
Цæгат Ирыстоны æнæниздзинадхъахъхъæнынады министрады афтекты скъладмæ бахæццæ вæййынц, æрмæст маркировкæ кæуыл ис, ахæм препараттæ. Уый та фадат дæтты сæ хæрзхъæддзинадыл ма гуырысхо кæнынæн.
Республикæйы афтекты ныртæккæ, кæй зæгъын æй хъæуы, фылдæр агурынц вирусы ныхмæ препараттæ. Уыимæ сæ цух не ййафынц, зæгъынц куыстуат «ФармацИя»-йы.
Хи хъахъхъæнæн фæрæзтæй дæр ифтонг сты уæлдайджынтæй, зæгъынц «Осфармедтех» -ы. Уыимæ рæстæгæй-рæстæгмæ сæ самал кæнынц ноджыдæр. Маскæтæ, æрмкъухтæ, хъахъхъæнæн медицинон костюмтæй цух не ййафынц куыд Дзæуджыхъæуы медицинон куыстуæтты, афтæ республикæйы æппæт районты дæр.
