Уый тыххæй федералон бæрнон кусæг фехъусын кодта Цæгат Ирыстоны сæргълæууæг Битарты Вячеславимæ фембæлды
Уæрæсейы Федерацийы хицауады сæрдары хæдивæг Виталий Мутко загъта, цæттæ кæй у Беслæнмæ ссæуынмæ, бынæттон цæрджытимæ аныхас кæнынмæ æмæ сын сæ лыггæнинаг фарстатыл æрдзурынмæ. Уый тыххæй федералон бæрнон кусæг фехъусын кодта Цæгат Ирыстоны сæргълæууæг Битарты Вячеславимæ фембæлды. Уый та йын загъта бузныг, нæ республикæмæ ахæм æргом кæй здахы, уый тыххæй. Виталий Мутко æмæ Битарты Вячеслав ма æрдзырдтой нæ республикæйы социалон-экономикон рæзты мадзæлттыл 2025-æм азы онг. Сæрмагонд программæ æххæст кæнгæйæ, Цæгат Ирыстоны нысан кæнынц 50 объекты саразын. Абоны онг уал эксплуатацийы радтой 6. Уый фарон, ацы аз та уыдзысты дыууыны бæрц. Уый тыххæй федералон центрæй радих кодтой 8 миллиард сомы. Уыдонæй иу миллиард æмæ 500 сæдæ милуан сомы райстой ацы аз. Уымæй дарддæр бацæттæ кодтой уынаффæ, 179 милуаны резервон фондæй радих кæныны тыххæй. Уыдонæй арæзт æрцæудзысты æнæниздзинадхъахъхъæнынады 7 объекты. Хæххон курорт «Мамысон»-ыл дзургæйæ æмæ йын хицæн экономикон зонæйы статус раттыны тыххæй та бакуыста Уæрæсейы Хицауад, загъта Виталий Мутко. Цæгат Ирыстоны сæргълæууæг та радзырдта фидæнмæ нысанты тыххæй. Уыдонмæ гæсгæ федералон экспертизæ проектон-сметон документаци кæнын фæуыдзæн февралы, æмæ райдайдзæн проекттæ царды уадзын. Уыимæ сæхимæ здахдзысты инвесторты ргом, цæмæй дзы арæзт цæуой фысымуæттæ æмæ æндæр объекттæ.
