«Владикавказ-Лада»-йы кусджытæ ныр афæдзы бæрц мызд нæ исынц

20 июня 2014, 11:27

73095

Иуæй иу куыстуæтты разамынд хъуыддæгтæм куыдфæндыйы цæстæй кæй кæсы, æмæ æмбæлгæ гæххæттытæ раст кæй нæ арæзы, уый аххосæй зын уавæры бахауынц сæ кусджытæ. Афтæ рауад «Владикавказ-Лада»-имæ дæр. АвтоВАЗ-ы дилер Дзæуджыхъæуы æрцыд æхгæд. Йæ кусджытæ та афæдзы бæрц сты æнæ мыздæй.

«Владикавказ-Лада»-йы кусджытæ ныр афæдзы бæрц мызд нæ исынц. Куыстуат сæ хæс дары 3 милуаны 500 мин сомы. Бафидын та сæ ис æрмæстдæр иу хуызы – куыстуат банкротыл нымад куы æрцæуа, уæд. Фæлæ уæд та адæм æнæ куыстæй баззайдзысты.

Ларисæ Наливкина, «Защита нарушенных прав человека»-йы Цæгат Ирыстоны регионалон хайдады сæргълæууæджы хæдивæг: «Кусджытæ хорз сты. Æнæзæрдæхудтæй фæллой кодтой. Ныр дæр сæ бон у кусын. Фæлæ сын уыцы фадат нал ис. Афтæмæй та сæ алкæмæндæр ис бинонтæ, цот. Уыдонмæ хъæуы зилын, дарын сæ. Æмæ хъуамæ сæ ныййарджыты хæс куыд æххæст кæной? Ныр та цы уынæм. Куыстуат сæхгæдтой. Адæмы æгуыстæй ныууагътой. Уый нæ, фæлæ ма сын сæ мызд дæр нæ фидынц».

Цы уавæр сæвзæрд, уым аххосджын сты куыстуаты раздæры разамонджытæ. Цалдæр азы размæ дæр ма уыд «АвтоВАЗ»-ы хуыздæр дилер, ома уæйгæнæг. Æфтиаг сæм цыд машинæтæ æмæ сын ивæн хæйттæ уæй кæнынæй. Афæдзы размæ дзы рабæрæг куыстуаты исбоны давд. Уæдæй фæстæмæ «АвтоВАЗ» акционерон æхсæнад «Владикавказ-Лада»-йæн нал æрвыста нæдæр сæ машинæтæ, нæдæр кусæнгæрзтæ, нæдæр ивæнхæйттæ.

Æбысалты Иринæ, товаровед «Зындзинæдтæ райдыдтой афæдзы размæ. Уæд инвентаризацигæнгæйæ рабæрæг сты дæвдтытæ. Растдæр зæгъгæйæ та, машинæтæ цыдæр фесты. Уæд нын «АвтоВАЗ» нал ласта уæй кæнынæн ног машинæтæ. Куыд æй æмбарут, афтæмæй та куыстуат ницы æфтиаг исы. Æмæ адæм æнæ ницæмæй баззадысты».

Куысджыты хъуыдымæ гæсгæ ахæм уавæры хуымæтæджы нæ бахаудысты. «Владикавказ-Лада»-йы разамынд хъуыддæгтæ æмæ æмбæлгæ гæххæттытæ раст нæ арæзта.

Слестгæнæн оргæнтæ куыд сбæрæг кодтой, афтæмæй 2011 азы рабæрæг исбоны давд. Кусджыты æппæт хъæстыты фæдыл та ма хъæуы ноджыдæр иу, бæстондæр слест скæнын.

Юлия Хлудеева, Дзæуджыхъæуы Терчыфалейы районы прокурор: «Слестгæнæн комитет скодта æппæт æмбæлгæ куыстытæ æмæ æркаст куыстуаты хъуыддæгтæм. Комитет скодта процессуалон цæстдард дæр. «Владикавказ-Лада»-йы хицау Цумаев Мусайы куыст ницы аиппдзинæдтæ рабæрæг æмæ хъуыддаг сæхгæдтой. Цы уынаффæ рахастой уымæн закъонмæ гæсгæ лæвæрд æрцæудзæн дзуапп».

Прокуратурæй зæгъынц: «Æппæты фыццаг хъуамæ хъахъхъæд цæуой кусджыты бартæ, сæрмагондæй та сын хъуамæ сæ мызд фыст æрцæуа». Хъыгагæн уый къухы бафтдзæн æрмæстдæр куыстуат ауæй кæнгæйæ.