Уый тыххæй кусæг фембæлды дзырдтой нæ бæстæйы президент æмæ Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло
Владимир Путин зæрдæ бавæрдта, Беслæны социалон-экономикон райрæзтæн уæлæмхасæн фæрæзтæ кæй радих кæндзæн, уымæй. Уый тыххæй кусæг фембæлды дзырдтой нæ бæстæйы президент æмæ Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло. Цæгат Ирыстоны разамонæг Владимир Путинæн радзырдта, Беслæны райрæзты пъланы цы 40 мадзалы ис, уыдоны тыххæй. Сæ сæйрагдæр у профилактикон хъомылады æмæ тероризмы ныхмæ музейы арæзтад. Уыцы нысантæн бахъæудзæнис 800 милуан сомы. Ныртæккæ та специалисттæ кæсынц индустриалон-логистон парчы проектмæ. Йæ бындурыл сараздзысты ног домæнтæм конд æфсæнвæндаггон терминал. Дарддæр та дзы, гæнæн ис, æмæ саразой технопарк сæрмагонд таможняйы бынатимæ. Владимир Путин уыцы хъуыдыйымæ сразы. Нæ республикæйы социалон-экономикон райрæзты бындур у хъæууон хæдзарад. Сергей Меняйло радзырдта, цы ног дыргъдæттæ ныссагътой, уыдоны, стæй кæсагдарыны къабазы райрæзты тыххæй. Бæлвырд дзырдтой республикæйы социалон-экономикон райрæзты хицæн программæйыл дæр. Фембæлды кæрон Владимир Путин загъта, цæмæй уæлдай æргом аздахой доны хæрзхъæддзинад æмæ дондзæуæнты уавæрмæ, уымæн æмæ уыцы фарста бирæ азты дæргъы тыхсын кæны республикæйы цæрджыты. Уымæй уæлдай фæсидтис, цæмæй бацархайой сывæллæтты рæвдауæндæтты бынæтты нымæц фæфылдæр кæнын. Фембæлды рæстæг дзырдтой республикæйы туризмы райрæзтыл дæр, бæлвырддæр та хæххон курорт «Мамысоны» фидæныл. Сергей Меняйло бахаста фæндон, цæмæй Дзæуджыхъæу бахæссой, туроператорты курдиæттæм гæсгæ сæрмагонд рейсытæ цы горæттæм вæййы, уыдоны номхыгъдмæ. Субсидитæ та йын радих кæндзысты федералон бюджетæй. Уæлдай æргом Сергей Меняйло аздæхта нæ республикæйы санаторитæ æмæ курорттæ сног кæныны хъуыддагмæ.
