Æппæтуæрæсеон адæмон фронты регионалон хайæдты минæвæрттæ та абон адæмы æрбахуыдтой пресс-конференцимæ бакæсыны сæрмагонд фæзтæм
Абон уыд Уæрæсейы Президент Владимир Путины æрвылазон стыр пресс-конференци. Ацы аз арæзт æрцыд 15-æм хатт. Пресс-конференцимæ аккредитаци райстой 2 мин журналисты. Се хсæн сты Цæгат Ирыстоны дзыллон информацийы фæрæзты минæвæрттæ дæр. Президенты фæндонмæ гæсгæ, журналистты бон уыд раттын цыфæнды фæрстытæ дæр. Пресс-конференцийы рæстæг дзырдтой алыхуызон темæтыл. Журналистты базонын фæндыд æрмæст Уæрæсе æмæ дунеон политикæйы тыххæй нæ, фæлæ ма суанг президенты царды хабæртты тыххæй дæр. Пресс-конференцимæ бакæсæн уыд каналтæ Россия 1, «Россия 24», Первый каналы, НТВ, стæй байхъусæн радиостанцæтæ «Маяк», «Вести ФМ» æмæ «Радио России». Æппæтуæрæсеон адæмон фронты регионалон хайæдты минæвæрттæ та абон адæмы æрбахуыдтой пресс-конференцимæ бакæсыны сæрмагонд фæзтæм. Цæгат Ирыстоны сæ байгом кодтой национ наукон библиотекæйы, Мæздæджы Пушкины номыл библиотекæйы, стæй Уæллаг Фыййагдоны культурæйы Хæдзары. Пресс-конференцимæ бакæсынмæ æрбацыдысты политологтæ, социологтæ, регионалон хицаудзинады оргæнты минæвæрттæ, журналисттæ æмæ æхсæнадон кусджытæ. Президенты æрвылазон ныхас куы фæци, уæд се ппæт дæр æрныхас кодтой йæ хатдзæгтыл, æмæ снысан кодтой ахсджиагдæр хъуыддæгтæ.
