Хæтæлтæ пъланмæ гæсгæ баивынц, æмæ сæ архайынц æмбæлгæ хуызы эксплуатаци кæныныл
Сыгъдæггæнæн куыстытæ æртæ мæйы иу хатт кæм æмбæлы кæнын, уымæ сæ муниципалон унитарон куыстуат «Владсток»-ы специалисттæ фæкæнынц алы мæй дæр. Хъуыддаг афтæ рауад, æмæ сæ бæрны сты 3 системæйы: дондзæуæн, канализацион æмæ уарынты дон кæдæм кæлы, уый. Хæтæлтæ пъланмæ гæсгæ баивынц, æмæ сæ архайынц æмбæлгæ хуызы эксплуатаци кæныныл. Фæлæ уый нæ хынцгæйæ, куыстуаты фæллойгæнджыты хæстæ фылдæрæй-фылдæр кæнынц. Цы у йæ аххосаг, уый тыххæй радзурдзæн Фидараты Маринæ.
Райсомæй раджы цыбыр æмбырд, æмæ уый фæстæ муниципалон униатрон куыстуат «Владсток»-ы специалисттæ сбæрæг кæнынц сæ боны куысты фæтк. Ацы аз сентябры куыстуат баиу кодтой Дзæуджыхъæуы «Водоканал»-имæ. Уымæ гæсгæ сæ архайд фæхъомысджындæр, сæ хæстæ та фæфылдæр сты. Нырæй фæстæмæ ам дзуапп дæттынц 3 хуызы куыстæн. Лæггад кæнынц дондзæуæн, канализацион æмæ уарынты дон кæдæм цæуы, уыцы системæтæн. Организацийы фæллой кæны 800 адæймаджы онг.
Фæлæ канд зæронд хæтæлтæ не сты уавæры аххосаг, зæгъынц специалисттæ. Арæх адæм чъизидæтты хæтæлтæ уарындæтты системæмæ кæй саразынц, стæй ма дзы бырæттæ дæр кæй æппарынц, уый аххосæй дæр системæйы куыст бакъуылымпы вæййы. Домæнтæм гæсгæ, алы ахæм цъай хъуамæ гом кæной 3 мæйы иу хатт. Фæлæ дзы уыйбæрц бырæттæ æрæмбырд вæййы, æмæ йæ специалисттæ байгом кæнынц зынгæ арæхдæр. Сæппарынц дзы полиэтиленæй дзæкъултæ, пластикæй æмæ æфсæйнаг æвгтæ дæр.
Хатгай дзы фылдæр æмæ сытрдæр предметтæ дæр ссарынц. Куыд бахауынц уырдæм, уый зын зæгъæн у. Фыдгæнджыты ницы уыромы. Суанг ма æфсæйанг бырутæ дæр раппарынц, æмæ сæ сæрмагонд пункттæм, æхцайыл баивыны тыххæй бахæссынц. Уавæрæй ис æрмæстдæр иу рацæуæн, зæгъынц Владстокы – хъæуы дзы æфсæйнаг конструкцитæ бандадзын. Уыимæ ма æппæт коллектортыл бырутæ скæнæн зын у. Дзæуджыхъæуы сæ нымæц у 10 минæй фылдæр.
Гугкайы-фырты бирæфатерон хæдзæрттæй иуы кæрты ныртæккæ сыгъдæг кæнынц дондзæуæн хæтæл. Бирæ рæстæг хæдзары кæрты иу хайы æппынæдзух æмбырд кодта дон, æмæ сси цъымарайы хуызæн. Йæ аххосæгтæй иу у – æнæзакъон арæзтад дзы кæй цыди, уый дæр.
Дзæуджыхъæуы дондзæуæн хызтæн ивинаг сты се 80 проценты. Ныртæккæ куыст цæуы се сног кæныныл. Фæлæ процесс фæтагъддæр кæнынæн фадат ис, зæгъынц специалисттæ. Уымæн баххуыс уаид, ацы коммуналон лæггæдтæн адæм куыд æмбæлы, афтæ куы фидиккой, уæд.
