Сæрмагонд хъуымац æххуыс кæны дронты тепловизортæ асайын, æмæ афтæмæй бахъахъхъæнын цард
Волонтертæ суворовонтимæ иумæ хуыйынц хъæццултæ сæрмагонд æфсæддон операцийы хæстонтæн. Сæрмагонд хъуымац æххуыс кæны дронты тепловизортæ асайын, æмæ афтæмæй бахъахъхъæнын цард. Хъæццултæ ныридæгæн хæсты быдыры ацыдысты фæлварæнтæ. Бæлвырддæр радзурдзæн Хъайтмазты Дзерассæ.
Ахæм тактикон хъæццулты фæрцы хæстонтæ знаджы тепловизортæн æнæуынгæ свæййынц. Регионалон змæлд «Хуыйæм æмæ быйæм ныхиуæттæн. Уарзондзинадимæ Ирыстонæй»-ы волонтертæ сæ цæттæ кæнынц октябрæй фæстæмæ. Хъуымæцтæ æлхæнынц Мæскуыйы æмæ Пятигорскы. Ахæм хъуымацы иу рулонæй уайы 15 хъæццулы – 15 ирвæзынгонд царды.
Тактикон хъæццултæ цæттæ кæнын зын нæу, фæлæ хъæуы лæмбынæг уæвын. Ис дзы лыстæг хъуыддæгтæ. Суворовонтæ фыццæгтæ бавнæлдтой ацы куыстмæ.
Тактикон хъæццултæ ныридæгæн ацыдысты фæлварæнтæ хæсты быдыры. Æфсæддонтæ сæ пайда кæнынц. Куыд зæгъынц, афтæмæй ис иу фиппаинаг – машинæтæ куы бамбæрзай, уæд хъуымац тагъд стæвд вæййы. Дæргъвæтиндæр æмæ хъæрзхъæддæр фæлварæнтæ скодтой Адæмон фронты минæвæрттæ. Быдырон уавæрты, æхсæвыгон 2 сахаты бæрц кастысты хъæццулты бæрæггæнæнты ивддзинæдтæм.
Волонтерты змæлды 8 филиалы аххæссыдысты æппæт республикæйыл. Хуыйынц æрмæст хъæццултæ нæ, фæлæ госпиталæн базтæ, уæлæдарæс. Кæнынц акъоппы цырæгътæ, быйынц маскировкæгæнæн хызтæ æмæ æндæр хъæугæ дзаумæттæ. Алкæмæндæр ис йæхи куыст. Пенсиисæг Дзансолты Тамарæ змæлды дыккаг аз ис.
Куыст ам иу минут дæр не *рлæууы, цæмæй алы 2 къуыри дæр хæстонтæ исой хъæугæ æххуыс æмæ ныфсимæ цæуой Уæлахизмæ.
