Республикæйы æрмæст цалдæр адæймаджы сты ацы куыстыл хæст
Нæ программæйы дарддæры хъайтар равзæрста, арæх чи не мбæлы, ахæм дæсныйад, æмæ дзы сси æцæг профессионал. Юрий Хачаянц 40 азæй фылдæр зилы музыкалон инструменттæм. Республикæйы æрмæст цалдæр адæймаджы сты ацы куыстыл хæст. Уыдонимæ Юрий дæр. Музыкалон интрументты рæсугъд зæлынад райхъуысы сæ арæхстджын къухты фæрцы. Бæлвырддæр хабæрттæ радзурдзæн Чехойты Фатимæ.
Лæмбынæг æмæ хъавгæ архайд. Юрий Хачаянц равзæрста тынг цымыдисаг профессионалон фæндаг. Дохтыры хуызæн æдзухдæр йæ зæрдыл дары – де *внæлдæй зиан ма рхæсс. Ахæм ахаст сæхимæ домынц музыкалон инструменттæ. 40 азы размæ райдыдта рояльтæм зилын. Цæмæй профессионал суа, уый тыххæй йæ хъуыд зæрдиагæй кусын.
Юрий Хачаянцы куыст зынгæ дæр нæ кæны, бирæтæн зонгæ дæр нæу. Никуы фæнд кодта ахæм куыст равзарын. Æрыгонæй музыкалон инструменттæй йæ зæрдæмæ тынгдæр цыд скрипкæ. Фæлæ рынчынтæгæнаг лæппуйæн фадат нæ фæци йæ уарзон инструментыл сахуыр кæнынæн. Уыцы рæстæг равзæрста йæхицæн ног дæсныйад. Афтæ йæ бауарзта, æмæ ма йæ ныр дæр дисы æфтауы йæ алывæрсыгдзинадæй.
Концерты размæ, йæ фæстæ æмæ куы фæцæуы, уæддæр… Æрмдæсны æдзухдæр вæййы инструменты фарсмæ. Мыййаг, йе ххуыс куы бахъæуа инструменты, кæнæ та йыл чи цæгъды, уыцы музыканты. Концертæн æнæ инструменты сыгъдæг зæлтæй уæвæн нæй.
Фортепиано, музыкант æмæ инструменты зæлтæ растæвæрæг – иу рахысы 3 цæджы. Се *хсæн ис æнгом бастдзинад. Æмæ кæд музыкалон инструментты мастерæн йæхи нæ фæуынæм, уæддæр музыкæйы равзæрды у йæ сæйраг архайджытæй иу.
Инструменттимæ архайды сусæгдзинæдтæ зонын фаг нæу ацы куысты. Музыкæйы зæлтæ æмбарын хъæуы йæ фыццаг нотæтæй. Æнæ уымæй нæй банывыл кæнын роялы, пианино кæнæ гитарæйы зæлынад. Æрмæстдæр сфæлдыстадон миниуджытæй хайджын адæймаг сæххæст кæндзæн уыцы хæс. Юрийæн йæ зæрдæ музыкæимæ рагæй баст у, кæд ныртæккæ инструментты миддунеимæ кусы, уæддæр.
Юрий иу инструмент дæр æнæ йæ цæстдардæй нæ уадзы. Уарзæгой фыды хуызæн вæййы сæ фарсмæ алы уавæрты, зæгъæм, фортепиано Вахтанговы хæдзарæй композиторты Цæдисмæ *баласыны рæстæг. Инструмент æрбаздæхт йæ хæдзармæ. Тагъд та дзы райхъуысдзысты музыкæйы зæлтæ. Ныр ма уал æй хъæуы сæмбырд кæнын. Уый фæстæ та – бакусын йæ рæсугъд зæлынадыл.
Ацы рояль – æрмæст иу инструмент у, Юрий Хачаянц кæй снывыл кодта, уыдонæй. Композиторты Цæдисы инструменттæй уæлдай ма бирæ æндæр рояльтæ, пианинотæ æмæ гитарæтæ æнхъæлмæ кæсынц Юримæ. Йæ дæсны къухтæй уый нырма цал æмæ цал музыкалон инструментæн снывыл кæндзæн сæ зæлынад.
