Арæзтадон фæзы куыстыты рæстæг дзыхъхъы ныххаудта уæзæгтæласæн кран. Ирвæзынгæнджытæ машинисты сластой кабинæйæ, хъыгдард дзы баййæфта, дзыхъхъы чи куыста, уыцы нæлгоймаг дæр.
30 метры бæрзæндæн уæзæгтæисæн кран æрхаудта Зæрæмæджы ГЭС-мæ суткæйы дæргъы сæ цæст кæцæй дарынц, уыцы арæзтадон фæзы. Ацы объект цæуы хъахъхъæд, æмæ нын æдасдзинады службæ не сфæлдыстадон къорды нæ бауагъта бынаты видеокамерæмæ сисын. Фыдбылыз куыд æрцыд, уый чи федта, уыцы кусджыты ныхæстæм гæсгæ кранæн асаст йæ уæз цæмæй фæисы, уыцы хай. Æмæ иуфарсæрдæм ахауд. Фыдбылызы рæстæг хъыгдард баййæфтой дыууæ адæймаджы, машинист æмæ бетон чи змæста, уыцы кусæг. 43 аздзыд Шамилов æмæ 23 аздзыд Курбаналиевы алыхуызон цæфтимæ æвæстиатæй аластой Нузалы ранчындонмæ. Дохтыртæ куыд зæгъынц, афтæмæй сæ уавæр у уæззау.
Арæзтады кусджытæ куыд зæгъынц, афтæмæй кран иста æрмæст 30 кг уæз. Ахæм стыр машинæйæн уыцы уæз у тынг рог. Фæлæ, кран уыд зæронд æмæ йæ конструкци нæ бафæрæзта.
Йæ бон уыд æмæ дзы хъыгдард баййæфтаиккой фылдæр адæм. Уыцы рæстæг арæзтадон фæзы уыд 30 кусæджы. Кран сæ æрхауд чысыл æддæдæр.
Фыдбылызы бынаты куыстой æнæнхъæлæджы уавæрты министрады специалисттæ, æмæ РусГидро-йы къамис. Уавæр бæлвырдгонд кæнынц бæстондæр.
