Ацы фарстайыл ныхас цыд, объекттæ æвзарыны æмæ сын аргъ кæныны регионалон экспертон советы фыццаг æмбырды
«Зæдæлескы Нана», «Традицион æртæ кæрдзыны» æмæ «Симд» гæнæн ис æмæ бацæуой, Уæрæсейы æнæматериалон этнокультурон хæзнаты объектты ног федералон реестрмæ. Ацы фарстайыл ныхас цыд, объекттæ æвзарыны æмæ сын аргъ кæныны регионалон экспертон советы фыццаг æмбырды. Разамынд ын лæвæрдта, культурæйы министры хæстæ рæстæгмæ æххæстгæнæг Рæмонты Маринæ. Советы хыгъдмæ бацыдысты культурæйы æмæ наукæйы архайджытæ, Ирыстоны æнæматериалон бынтæ иртасыныл чи кусы, уыдон. Ахæм куыст рагæй æххæст кæнынц адæмон сфæлдыстады республикон хæдзары специалисттæ. 2019-æм азæй кусджытæ экспедициты цæуынц Цæгат æмæ Хуссар Ирыстоны хъæутæм, ныхас кæнынц хистæртимæ, стæй нысан кæнынц алыхуызон ритуалты, æгъдæутты æмæ кадæгты æрфыст. Ацы куысты бындурыл конд цæуы республикон реестр. Уырдыгæй 5 объекты ныридæгæн бацыдысты федералон реестрмæ. Абон арæзт цæуы ног реестр. Æмæ йæм цы объекттæ гæнæн ис, æмæ бахæссой, уыдонмæ æркастысты экспертон советы уæгтæ.
