Зæдæлескы хъæуы ис Нанайы музей
Зæдæлескы Нанайы бæрæгбон сбæрæг кодтой Дыгургомы. Рагон заманы таурæгъмæ гæсгæ, Тимуры æфсæдтæ 14-æм æнусы Аланимæ куы æрбабырстой, уæд легендарон сылгоймаг сæмбырд кодта хæхты цæрæг сидзæр сывæллæтты, бирæ ирыстойнаг мыггæгты минæвæртты æмæ сæ бахъахъхъæдта. Зæдæлескы хъæуы ис Нанайы музей. Хъæбатыр сылгоймаджы ном ссарынмæ æмæ йæ кадæн арфæйы ныхæстæ зæгъынмæ æрбамбырд сты адæм республикæйы алы районтæй. Бæлвырддæр радзурдзæн Хъайтмазты Дзерассæ.
Ацы тыхы бынат йæхимæ æлвасы адæмы. Зæдæлескы Нана кæм царди, уыцы хæдзармæ адæмæн сæрмагонд ахаст ис. Нанайæ фæкурынц амонд, бафæдзæхсынц сывæллæтты. Гергиты Илонæ йæхиуыл банкъардта ацы бынаты тых. Фарон цы бæллицы фæдыл æрбацыд, уый сæххæст. Ныр Зæдæлеск бабæрæг кодта иунæгæй нæ, — йæ сæйрагдæр лæваримæ – йæ чызг Аминæтимæ.
Нанамæ куывдтытæ кæй сæххæст уыдзысты, ууыл ам дызæрдыг ничи кæны. Уымæн æмæ нымад у алайнаг сидзæрты ирвæзынгæнæгыл Тимуры æрбабырсты рæстæг. Уæд сывæллæтты сæмбырд кодта æмæ сæ Зæдæлескмæ хæстæг лæгæты бамбæхста. Текъойты Зинæидæйы дæр хъæуы Нана хонынц. Цæрæнбонты ам фæцардис, æмæ Нанамæ скувын уый фæкурынц.
Бæрæгбонмæ æрбамбырд сты адæм æппæт республикæйæ. Цыдысты æнæхъæн бинонтæ, æмæ ма суанг кусæг къордтæй дæр. Змейскæйы сывæллæтты рæвдауæндоны минæвæрттæ ам раздæр уыдысты, фæлæ бæрæгбонмæ фыццаг хатт бахаудтой.
Уазджытæн бацæттæ кодтой программæ кæфтытимæ, зарджытимæ, æмдзæвгæтимæ.
Мадзал бабæрæг кодта республикæйы сæргълæууæг Сергей Меняйло дæр. Йæ указмæ гæсгæ 2 азы размæ Зæдæлескы Нанайы бæрæгбон сси официалон æгъдауæй национ бæрæгбон.
Зæдæлескы Нанайы фæлгонц ис Ирыстоны алы сылгоймаджы дæр. Йе сгуыхтдзинад æмæ йæ уды фидардзинад рох никуы уыдзысты.
