1943-æм азы уым цыдис карз тох. Сæрды агурæн кампанийы рæстæг, хæдтæхæджы ссардтой æфсæддон хъæбатыры стæгдартæ.
Сыгъдæг арв хъахъхъæнæг. Зæнджиаты Владимиры хæдтæхæг срæмыгътой Калугæйы сæрмæ. 1943-æм азы уым цыдис карз тох. Сæрды агурæн кампанийы рæстæг, хæдтæхæджы ссардтой æфсæддон хъæбатыры стæгдартæ. Хæдтæхæг ныр уыдзæни районы музейы, хæстоны та æппæт æфсæддон кад æмæ намысимæ сластой йæ райгуырæн зæххмæ.
Тæхæг Зæнджиаты Владимиры бинонтæн лæвар кæнынц зæрдылдарæн фæйнæг. Ирдæй йыл æвдыст цæуынц хæдтæхæг кæм æрхауди, уыцы бынаты хæстонæн цы хи дзаумæттæ ссардтой, уыдон. Йæ хиуæттæ сæ зæрдæ дæр нал дардтой, Владимиры стæгдартæ ма йæ райгуырæн бæстæйыл сæмбæлдзысты, ууыл.
Зын бауырнæн у, агурæн къорд «Мысæм»-ы бархионтæн цы стыр куыст бакæнын бафтыд сæ къуыхы, уый. Зындзинæдты сæрты ахизгæйæ Калугæйы облæсты быдырты ссардтой кæддæр дзы цы хæдтæхæг æрхауди, уый хæйттæ. Рагагъоммæ сæм бæрæггонд ницы уыди, æрмæстдæр картæйыл снысан кодтой, фыдбылызмæ хæстæг бынат. Йæ алыварс æрмæстдæр лакъон дæттæ æмæ цадтæ. Машинæйæ дзы ацæуæн нæй. Адæймагæн дзы исты чи бацамона, ахæмтæ дæр нæй. Хæдтæхæг ссарынæн дзы фадæттæ хæрз гыццыл. Фæлæ уый нæ хынцгæйæ, бархионтæ уæддæр ацыдысты 20 км фылдæр. Ссардтой уал дзы иу гыццыл дзыхъ. 70 азæй фылдæрмæ ацы бынæттæ кæй зæгъын æй хъæуы ивгæ дæр акодтой. Сбæрæг æй кодтой æфсæйнаг агурæнæй. Дыууæ ментры зæххы быны кусæнгарз ссардта хæдтæхæджы иу хай.
Кæсæр лейтенант Зæнджиаты Владимир фæмарди уæлдæфон тохы рæстæг, 43-æм азы сæрды. Цыдис ыл 21 азы. Тæхæг тох кодта 303-æм авиадивизийы. Владимиры царды фæстаг бон, 14 июлы, тæхджытæн арфæ ракодтой Бастилия кæй райстой, уый тыххæй. Командæгæнджытæ се ппæтæн дæр скодтой ныстуантæ æмæ фæдзæхстытæ. Афтæмæй та æфсæддонтæ араст сты радон тохмæ. Хъыгагæн уырдыгæй нал æрбаздæхти дыууæ хæдтæхæджы. Сæ иуæн дзы разамынд лæвæрдта Зæнджиаты Владимир. Йæ хæдтæхæг ын срæмыгътой, йæхицæй йе фсæддон хæлары куы æмбæхста, уыцы рæстæг.
Зæнджиаты Владимиры йæ зæххы хайыл сæмбæлын кæнынмæ æрбацыдысты йæ хæстæджытæ, ветерантæ, æфсæддон æмæ патриотон организациты минæвæрттæ. Йæ цард кæй тыххæй радта, уыцы сыгъдæг арвыл та хæдтæхæг йæ номыл æрзылди æртæ хатты.
