Объекты цæттæдзинадмæ æркастысты республикæйы сæргълæууæг Битраты Вячеслав æмæ акционерон æхсæнад «РусГидро»-йы генералон директор Николай Шульгинов
Зæрæмæджы ГЭС эксплуатацийы раттынмæ хъавынц ацы аз декабры. Объекты цæттæдзинадмæ æркастысты республикæйы сæргълæууæг Битраты Вячеслав æмæ акционерон æхсæнад «РусГидро»-йы генералон директор Николай Шульгинов. Ныры онг электростанцæйы бафæлвæрдтой гидротехникон кусæнгæрзтæ, деривацион тъунел, сæрмагонд бассейн, кæронмæ фæхæццæ кæнынц территори аивгæнæн куыстытæ. Зæрæмæджы ГЭС-1-ы бæстыхайы сæвæрдтой дыууæ турбинæйы. Сæ тых у 346 МВт. Афтæмæй гидроэлектростанцæ афæдзмæ кусдзæн 850 млн кВт. Станцæ суыдзæн æппæтæй тыхджындæр Уæрæсейы, æмæ йын уыдзæн се ппæтæй стырдæр турбинæтæ. Деривацион тъунель дæр нæ бæстæйы у иунæг. Йæ дæргъ у 14 мины 254 метры, зæгъы «РусГидро»-йы пресс-службæ. Зæрæмæджы ГЭС-1-ы эксплуатацийы куы радтой, уæд уый республикæйы бюджетмæ фæфылдæр кæндзæн хъæлонтæй æфтиæгтæ. Уый та хорзырдæм фæзындзæн нæ регионы электрон тыхæй ифтонг кæныны хъуыддагыл.
