Куыстдæттыны комитет сарæзта цалдæр армукъайы, фæлæ дзы алы аххосæгтæм гæсгæ бирæтæ сæхи аккаг куыст не сбæлвырд кодтой.
Завод «Электроцинчы» сæдæгай куысджытæ ныронг сты æгуыст. Куыстдæттыны комитет сарæзта цалдæр армукъайы, фæлæ дзы алы аххосæгтæм гæсгæ бирæтæ сæхи аккаг куыст не сбæлвырд кодтой. Афтæмæй се хсæн ис бирæсывæллонджынтæ. Куыд хизынц царды фæлварæнты сæрты, уый тыххæй дзуры Сосранты Жаннæ.
Дарчиты Розæ «Электроцинчы» бакуыста 21 азы. Лабораторийы бæрæг кодта хомаджы æмæ цæттæ продукцийы хæрзхъæддзинад. Йæ куыстæй уыд разы, фæлæ завод куы сæхгæдтой, уæд зындзинæдтæ сæвзæрдысты. Æгуыстæй канд Розæ нæ баззад, фæлæ йæ цардæмбал дæр.
Æнæфыст ипотекæ, тæрхондоны хъуыддаг æвзарыны цаутæ, ацы сценарий зонгæ у, «Электроцинчы» чи куыста, уыдонæн се ппæтæн дæр. Зæрдæмæдзæугæ куыст ссарын у бирæ адæмы мæт.
Республикæйы хицауад æххуыс кæны куыст сарыны фарстайы. «Электроцинчы» раздæры кусджытæн аразы лæвар юридикон консультацитæ. Зæрдæ æвæрынц кредитты фарста сæхгæнынæй дæр.
Ацы аз уал куыст ссардтой 43 адæймаджы, сæ фылдæр райстой ног дæсныйæдтæ.
