Завод «Радуга» нымад у нæ республикæйы промышленнон куыстæтты хуыздæртæй иуыл. Финансон кризисы рæстæг йæ куыст нæ фæкъуылымпы. Уый нæ, фæлæ ма фæстаг 5 азы йæ
Завод «Радуга»-йы се ппæт кусджытæ дæр архайынц метеолокатор саразыныл. Уыцы аппараты фæрцы ис 250 километры радиусы онг метеорологон бæрæггæнтæ цалдæр минутмæ райсын. Раздæр ын ам цæттæ кодтой йæ цавæрдæр элементтæ, æмæ-иу сæ æрвыстой сæйраг куыстуатмæ Мæскуымæ. Ныр Дзæуджыхъæуы æмбырд кæнынц метеолокаторæн йæ сæйраг хай. Уæрæсейы промышленносты æмæ хъахъхъæнынады министрадты заказ 2014-æм азмæ «Радуга» æххæст кæны Лианозовойы электромеханикон заводимæ иумæ.
Ацы контейнер у метеолокаторы сæйраг хай. Æвæрд дзы уыдзæн сæрмагонд электрон системæ. Дзуапп дæтдзæн граждайнаг авиацийы хæдтæхджыты архайды æдасдзинадыл.
Завод «Радуга» хъахъхъæнынады промышленносты къабазы ис 35 азæй фылдæр. Ныртæккæ куыстуаты архайд фæхуыздæр уыдзæн. Æрæджы райста лицензи æфсæддон техникæйы хицæн элементтæ нæ, фæлæ цæттæ продукци уадзынæн æмæ реализаци кæнынæн. Генералон директор Тауаситы Эльбрусы ныхæстæм гæсгæ, ацы хъуыддаджы сын стыр æххуыс бакодта республикæйы разамынд.
Тауаситы Эльбрус, гом акционерон æхсæнад «Радуга»-йы генералон директор: «Уыцы лицензи махæн дæтты бар сæрмагонд продукци цæттæ кæнынæн, æмæ йæ цæмæй нæхæдæг уæй кæнæм. Уый у стыр хорздзинад заводæн. Уый размæ мах куыд куыстам, скодтам цыдæр хорздзинад, æмæ йæ аластам Мæскуымæ, æмæ йæ Мæскуы сæхи номæй ауæй кодтой. Ныр та нын бар уыдзæн нæхи номæй уæй кæнынæн».
Фæстаг 5 азы заводы архайд ахадгæдæр кæны. Ныртæккæ гальваникон цехы ивынц æппæт кусæнгæрзтæ. Ацы хайад заводы у сæйрагдæртæй иу. Æфсæддон техникæйы алы хайыл дæр ам сæрмагондæй бакусынц.
Алы операцийы фæстæ хæйттæ ныхсынц 3 ваннæйы. Цехы 4 зæронды бæсты уыдзæн 3 ног линийы. Заводы разамынд бацархайдта экологон æдасдзинады фарстатыл дæр. Цехы сæвæрдтой нырыккон сыгъдæггæнæн системæ.
Хъæлыцты Сергей, РЦИ-Аланийы промышленносты æмæ транспортон политикæйы министры хæдивæг: «Ацы завод нымайæм, фыццаг бынаты чи ис, уыдонимæ. Цæмæн? Куыд архайынц йæ хицауад, йæ кусджытæ, уымæ гæсгæ иу 5 азы фæстæ ацы фæфылдæр уыдзæн, æмæ паддзахад хъуамæ кæса, цæмæй феххуыс кæна. Тагъд рæстæджы, куыд кæсæм, афтæмæй ацы заводы кусджытæ фылдæр исдзысты. Экономикæйæн дæр фылдæр фиддзæн завод йæхæдæг. Мæнмæ гæсгæ у размæ чи цæуы, ахæм завод».
Метеолокатортæй пайда кæнынц æфсæддон æмæ граждайнаг авиацийы. Завод «Радуга»-йы цы фыццаг ахæм аппарат бацæттæ кæной, уый æххуыс кæндзæн граждайнаг авиацийы æдасдзинады фарстатæ æххæст кæнынæн. Фидæны куыстуаты фæнд кæнынц, метеолокатортæ æфсæддон авиацийæн дæр цæттæ кæнын.
Хъайтмазты Дзерассæ
