Ныфсхаст, фидар, хъæппæрисджын командæгæнæг Стыр Уæлахизмæ нæ фæцард, фæлæ йæ ном æнустæм баззад историйы
Заводскойы 31-æм скъолайæн лæвæрд æрцыд Советон Цæдисы хъæбатыр Æхсараты Энверы ном. Ныфсхаст, фидар, хъæппæрисджын командæгæнæг Стыр Уæлахизмæ нæ фæцард, фæлæ йæ ном æнустæм баззад историйы. Ацы бонæй йын йе сгуыхтдзинæдты тыххæй зондзысты æппæтæй кæстæр скъоладзаутæ дæр. Ам ма сæнусон кодтой скъолайы рауагъдон Цæраты Николайы ном дæр. Сæрмагонд æфсæддон операцийы архайæг фæмард Запорожьейы облæсты. Йæ портрет ныр ис, Райгуырæн бæстæйы сæраппонд йæ цард чи радта, уыдоны хуызистыты фарсмæ. Мадзалы ма скъолайæн лæвæрд æрцыд «Уæлахизы арт». Ист æрцыд Намысы мемориалы Æнусон артæй. Акци иу кæны республикæйы æппæт ахуыргæнæндæттæ. Ис ын патриотон хъомылады нысан.
