Изæрыгон дзы зын рацæуæн у куыд фистæгæй цæуæгæн, афтæ хæдтулгæйыл дæр
Заводскойы уынгæтæй иуы цæрджытæ тыхсынц цырыгътæ сын дзы кæй нæй, уымæй. Изæрыгон дзы зын рацæуæн у куыд фистæгæй цæуæгæн, афтæ хæдтулгæйыл дæр. Сæ уавæр сын федта не сфæлдыстадон къорд. Ныхасы бар Сосранты Жаннæйæн.
Трассовыйы уынг цæуы Заводскойы хуссарвæрсты. Фæндаджы сæрты бахизæн ис цæхæрадæтты æмбалад «Локомотив»-мæ. Ацы районы шофырты уæлдай къæрцхъус уавын хъæуы изæрыгон. Фæндаггон фыдбылызтæ дзы æрцæуы мæй цалдæр хатты. Талынг рæстæг дзы адæймаг зын фенæн у, æнæ рухс здахæн сæрмагонд уæлæдарæсæй.
Уыимæ, ам цы адæм цæры, уыдон хъуыды дæр нал кæнынц уынджы цырæгътæ кæд уыди, уый.
Нæй дзы фистæгæй цæуджытæн фæндаджы сæрты бахизæн бынат дæр. Фæндаггон уагæвæрдмæ гæсгæ фæндаджы сæрты бахизын кæй фæнда, уый хъуамæ ацæуа иу æртæ километры. Уымæй хæстæгдæр дзы нысантæ нæй.
Хæстæгдæр хæдзæртты цæрджытæ курдиат балæвæрдтой Дзæуджыхъæуы администрацимæ. Зæрдæ сын бавæрдтой азы кæронмæ фарста раиртасынæй, фæлæ уавæр нæма аивта.
Трассовыйы уынджы рухс хъуамæ фæзына ацы аз. Ныридæгæн та уал йæ цæрджытæн сæхи агурын хъæуы гæнæнтæ сæ уавæр фенцондæр кæнынæн. Цæмæй фæндæггон фыдбылызтæ фæкъаддæр уой, уымæй шофырты къæрцхъусдæр уæвын хъæуы, фистæгæй цæуджыты та пайда кæнын хъæудзæн рухс здахæн элементтæй.
