Кинонывы æвдыст цæуы, Ирыстоны астæуккаг æнусты цыртдзæвæнтæ сног кæныныл реставратортæ куыд бацархайдтой, уый
Золойты Фатимæйы документалон киноныв «Хранители древности» равдыстой Дзæуджыхъæуы. Кинонывы æвдыст цæуы, Ирыстоны астæуккаг æнусты цыртдзæвæнтæ сног кæныныл реставратортæ куыд бацархайдтой, уый. Ацы куыст цыди Аланийыл саргъуыды 1100 азы бон сбæрæг кæныны фæлгæты. Кинойы сæйраг хъайтар Байсогъуырты Мухтар. У реставрацион къамисы генералон директоры хæдивæг. Денджызы æмвæзадæй 2 мин метры бæрзæндыл, цивилизацийæ дард уæвгæйæ, æнæхъæн командæимæ, уыдонимæ йе ртæ фырты дæр, кусы нæ рагфыдæлты историон цыртдзæвæнтæ бахъахъхъæныныл. Кино ист æрцыди республикæйы сæргълæууæг Сергей Меняйлойы æмæ Уæрæсейы кинематографистты регионалон Фонды æххуысæй. Фидæны йæ фæнд кæнынц федералон каналтæй иуы равдисын.
