филиал вгтрк государственная телерадиовещательная компания “Алания”

Бизнесмен фæсивæды бахуыдта гранд-отель «Александровскимæ». Алы уæлдæр ахуыргæнæндонæй дæр 10 студенты сæ хорз ахуыры, наукон иртасæн куыстыты се `нтыстдзинæдты æмæ активон æхсæнадон куысты тыххæй æрвылмæй дæр исынц фæйнæ 5 мин сомы. Фембæлды нысан уыд студенттимæ комкоммæ базонгæ уæвын æмæ фидæнмæ нысантыл æрныхас кæнын. Ацы æмбырды архайдтой Уæрæсейы ахуырады æмæ наукæйы министры хæдивæг Хъамболты Марат æмæ Уæрæсейы Федерацийы Советы уæнг Тотоонты Алыксандр, стæй нæ республикæйы наукæ æмæ ахуырады министр Огъуаты Алан. Боллоты Таймураз радзырдта йæ фæллойы фæндаджы тыххæй. Фæсидт, цæмæй студенттæ сæ зонындзинæдтæ дарддæр сæ фæллойæ парахатдæр кæной. Фембæлды студенттæм бирæ фарстатæ уыд, суанг ма Боллоты Таймуразæн йæ бирæ хæрзиуджытæй зынаргъдæр кæцы у, зæгъгæ. Таймураз у Уæрæсейы Федерацийы 3 ордены хицау, ис æм Францийы кадджын легионы Орден æмæ бирæ æндæр хæрзиуджытæ. Йæхæдæг куыд зæгъы, афтæмæй сæрыстыр у, йæ бизнес рæстдзинадыл амад кæй у, уымæй. Боллоты Таймуразы номыл стипенди Цæгат Ирыстоны интеллектуалон хъæздыгдзинад райрæзын кæнынæн у хорз æххуыс.

Боллоты Таймураз, Амалхъом адæймаг: «Бирæ фарстатæ мæм радтой, дзуапп сын радтон. Бафарстон сæ: «уæ зæрдæмæ фæцыд?». Загътой о, нæ мæ фæсайдтой. Ахæм æмбæлдтытæ кæндзынæн аз иу хатт».

Уалыты Элинæ, Хæххон паддзахадон аграрон университеты студент: «Ацы хъуыддаг у ахсджиагдæр хъуыддаг нæ рæстæджы æмæ стыр бузныг стæм Боллойты Таймуразæй, кæй нæм æркаст, кæй ныны æххуыс кæны. Бузныг стæм нæ факультеты декантæй, кæй нæ равзæрстой æмæ нын бар радтой ацы стипендии исын. Æмæ нæ хæс у дарддæр дæр ахуыр кæнын наукæйы æмæ æхсæнадон куысты».