Йæ цæрджытæ дзæвгар рæстæг тыхстысты сæ лыггæнинаг фарстатæй
Хъармгæнæн сезонмæ егъау объекттæ бацæттæ кæнынæй дарддæр ма ахсджиаг у цæрæн хæдзæрттæм базилын дæр. Уæвгæ та, бирæфатерон хæдзæртты фарстатæн сæ фылдæр сты иухуызон, стæй бирæазон. Дæнцæгæн æрхæсдзыстæм Доваторы проспекты бирæуæладзыгон хæдзар. Йæ цæрджытæ дзæвгар рæстæг тыхстысты сæ лыггæнинаг фарстатæй. Ныр та, зæгъæн ис, æмæ райдыдтой ног цард кæнын. Сæ уавæртæ сын хуыздæрырдæм цæхгæр аивта цæрæнуæтты хицæутты æмбалад «Хурзæрин».
Дæнцæгæн хæссинаг бæстыхай. Афтæ хонынц Дзæуджыхъæуы Доваторы проспекты фарастуæладзыгон хæдзар. Бирæ азты фæд-фæдыл архайдтой сæ алывæрсыг зын фарстатæ алыг кæныныл. Уыдон се ппæт бирæфатерон хæдзæрттæн зонгæ сты. Бæлвырддæр та – бæстыхайы сæр тагъди, коммуникацитæ базæронд сты. Уавæр ивын райдыдта, цæрæнуæтты хицæутты æмбалад «Хурзæрин» сæ йæхимæ куы райста, уæд.
Аивгæнæн куыстытæм дысвæлдæхтæй бавнæлдта æмбалады сæрдар Хуыгаты Анатолий, стæй хæдзары фарстатæн дзуапдæттæг Цæллаты Арабеллæ. Электрон тыхдæттæг телтæ баивтой подъездты, сцалцæг кодтой вентиляци æмæ бырæттæмæбырдгæнæнтæ, сæвæрдтой рухсытæ. Æппæтæй зындæр та уыди – цæрæнуæтты-коммуналон хæдзарады лæггæдтæн фиддонтæ сæмбырд кæнын.
Цалцæггæнæн куыстыты фæдыл цыфæнды уынаффæтæ дæр сфидар кæнынц иумæйаг æмбырдты. Сыхаг хæдзæртты цæрджытæ æрбацæуынц сæ фарстатимæ. Кæй зæгъын æй хъæуы, фылдæр сæ тыхсын кæны – сæ исбон растдæр куыд банывыл кæнæн ис, уый. Хуыгаты Анатолий зæгъы, ацы фарстайыл кусын хъæуы иумæйагæй, стæй афоныл лæггæдтæн фидын. Уæд алцыдæр рауайдзæн.
Хæдзары аивдзинадыл æмæ асфальт баивыныл куыстытæ цæуынц программæ «Горæты æнцонвадат архайд»-мæ гæсгæ. Фæстæдæр та хæдзæртты хицæутты æмбалад бавналдзæн территорийы цъæх фæлысты куыстытæм.
