Республикæйы æппæты хуыздæр лагерыл нымад у «Дзинагъа».
Цæгат Ирыстоны лагерьтæ æмæ сау денджызы был. Ацы аз республикæйæ цалдæр мин сывæлоны баулæфдзысты паддзахады хардзæй. Куыд цæттæ сты æнæниздзинадфидаргæнæн лагерьтæ, уый федта нæ æсфæлдыстадон къорд.
Республикæйы æппæты хуыздæр лагерыл нымад у «Дзинагъа», фæлæ фарон цæттæ нæ уыд сывæллæтты райсынмæ. Зынгсирвæсты ныхмæ мадзæлттæ дзы нæ уыд. Абон фарста лыггонд æрцыд æмæ лагерь у цæттæ.
Цæмæй нырыккон домæнтæн дзуапп дæтта, уый тыххæй кредит райста 500 мин сомы, зæгъы лагеры директор Найфонты Олег. Нысан кæнынц ног корпустæ саразын, зæрæдты та баивын сынтæджытæ æмæ скъæппытæ.
Кæд дзы ивддзинæдтæ æрцæудзæн, уæддæр лагеры директор зæгъы, хъæуы бахъахъхъæнын, æнæниздзинадфидаргæнæн лагерь Советон Цæдисы рæстæг цæй тыххæй уарзтой, уыцы æууæлтæ.
Адæм ма ацы ран уарзынц йæ алæмæты уæлдæфы тыххæй дæр. Ам дзæбæх кæнынц бронхæтæ. Фыццаг фæлтæрмæ лагерь æнхъæлмæ кæсы майы райдиан. Уыдон сты æххуысхъуаг æмæ бирæсывæллонджын бинонтæй. Цæттæ сты лагерьтæ «Ростсельмаш» æмæ «Комы-арт». Иннæ лагерьтæ сывæллæтты суазæг кодтой сæрды райдиан.
Сау денджызы был ацы аз Цæгат Ирыстонæй баулæфдзæн 1 мин сывæллонæй фылдæр. Рæстæмбис нымадæй сывæллæтты лагеры баулæфынæн хъæуы 20 мин сомы. Ахæм фæрæзтæ се ппæтмæ нæй, уымæ гæсгæ сæ зæрдæ дарынц паддзахадыл.
