Дунейы цæрæг адæмæй 3–4 % пайда кæнынц наркотиктæй. Уæрæсейы алы 100 мин адæймагæй 200 сты наркотиктæм æмхиц.
1987-æм азы Иугонд Нациты Организацийы Генералон Ассамблейæ рахаста уынаффæ, алы аз дæр 26-æм июны наркотикты æмæ се ’нæзакъон зилдухы ныхмæ тох кæныны æппæтдунеон бон бæрæг кæныны тыххæй. Дунейы цæрæг адæмæй 3–4 % пайда кæнынц наркотиктæй. Уæрæсейы алы 100 мин адæймагæй 200 сты наркотиктæм æмхиц. Уый у æгъатыр низ. Наркотиктимæ тох кæнынæн нæ республикæйы хицауад дæр аразы æппæт фадæттæ, уымæн æвдисæн Хохы Санибайы реабилитацион центр дæр.
Кæрчытæн хор акалын, стурвосмæ базилын. Ацы куыстытæ Роланæн хæссынц удæнцойдзинад. Хохы Санибайы реабилитацион центры лæппуйæн нæй уæгъд рæстæг. Фæнды йæ, цæмæй йæ нозт ныууадза. Разæнгард та йæ кæнынц карз нозт æмæ наркотиктыл ахуырæй йæхи чи фæхицæн кодта, ахæм адæм. Хохы Санибайы реабилитацион центры иу æмæ дыууæ не сты. Мамиаты Аслан кæддæр æвзонг лæппуйæ бахауд наркотикты уацары.
Хи бауромынæй та йæхицæн ныфсытæ æвæрдта 15 азы бæрц. Сайдта йæхи дæр æмæ йæхиуæтты дæр. Асланыл 6 азы цыд, йæ хойыл 10 сæ мад куы амард, уæд. Сывæллæтты схъомыл кодта сæ фыд æмæ Асланы тынг фæндыд стыр хæрзты йын бацæуын.
Асланæн бирæ зондамонджытæ уыд, йæхи дæр фæндыд наркотикты уацарæй рацæуын, фæлæ уыцы фæндагæй афтæ æнцонтæй хи нæ ратондзынæ.
Хохы Санибайы реабилитацион центр у кæронбæттæн къæпхæн. Уый размæ наркотиктыл чи сахуыр, уыцы адæмы дзæбæх кæнынц цалдæр къæпхæны. Фыццаджыдæр барвæндондзинад, уый фæстæ медицинон æххуыс. Фæлæ уый ахадгæ нæ уыдзæн, зæгъы наркологон диспансеры социалон кусæг Дзахсорты Таймураз. Рынчынты хъæуы реабилитаци. Æмæ уал сæ арвитынц Холстмæ.
Наркотиктимæ тох кæнынæн нæ республикæйы хицауад аразы æппæт фадæттæ. Уымæн æвдисæн Хохы Санибайы реабилитацион центр дæр. Йæ куыстимæ фарон базонгæ Битарты Вячеслав йæхæдæг дæр.
Хохы Санибайы реабилитацион центры Мамиаты Аслан у хистæр. Наркотиктæй чи пайда кæны, уыдон æм хъусынц, уымæн æмæ йæхæдæг дæр уыцы фæндагыл ацыд, фæлæ фæллойы æмæ Хуыцауы руаджы ссардта царды фæндаг. Ныр у 3 сывæллоны фыд.
