Паддзахад царды рауагъта цалдæр программæйы, æрыгон бинонты хи хæдзæрттæй ифтонг кæныны тыххæй
Фæсивæд бинонтæ куы скæнынц, уæд цы зындзинæдтыл сæмбæлынц, уыдоны сæйрагдæртæй иу у цæрæнуæтты фарста. Паддзахад царды рауагъта цалдæр программæйы, æрыгон бинонты хи хæдзæрттæй ифтонг кæныны тыххæй. Мадæлон капиталæй спайда кæнын, цæмæй ипотекон кредит фæкъаддæр уа, гыццыл проценттимæ кредит райсын, субсидитæй спайда кæнын, æмæ афтæ дарддæр. Республикæйы хъæуты цæрджытæй 25 бинонтæ ныридæгæн райстой фатертæ балхæнынæн фиддонтæ. Фæлæ цавæрдæр аххосæгтæм гæсгæ, Цæгат Ирыстон кредиттæ исыны рейтинджы 84 регионы хсæн ис 74-æм бынаты. Уæдæ цавæр зындзинæдтимæ сæмбæлынц адæм ипотекæ исгæйæ, уый тыххæй Касаты Наирæйы æрмæг.
Петруковичты бинонтæ цæмæй фатер ипотекæйæ райсой, уый тыххæй бирæ фæхъуыды кодтой. Бинонты дыккаг сывæллон куы райгуырди, уæд ныййарджытимæ иумæ дыууæуатон фатеры сæ бон цæрын нал уыд. Уавæртæ уыдысты тынг къуындæг. Сфæнд кодтой уæтты пълан аивын. Фæлæ хъуыддагæй ницы рауади. Уый фæстæ архайдтой субсиди райсыныл.
Фыццаг рæстæг æнцон нæ уыди, зæгъы хæдзары хицау. Кредитæн мæй фидын хъуыди 25 мин сомы. Уый та у бинонтæй иу адæймаджы мызд. Æххуыс сын кодтой сæ ныййарджытæ дæр. Рæстæг куыд цыди, афтæ фиддонты нымæц дæр фæкъаддæр, æмæ сси 11 мин сомы. Афтæмæй куыддæрты, гæнæн æмæ амалæй, сæ къухы бафтыди фатер срайдзаст кæнын.Ныртæккæ Андрейыл цæуы 38 азы. Ипотекон кредит æххæстæй бафиддзæн, 50 азы йыл куы сæххæст уа, уæд. Бинонтæ нæ фæсмон кæнынц сæ фæндоныл. Кæй зæгъын æй хъæуы, хуыздæр у фатер балхæнын, фæлæ гæнæн куы нæ уа, уæд иумæйаг тыхтæй ис цæрæнуаты фарста алыг кæнæн. Уæлдайдæр та ныртæккæ æрыгон бинонтæн ис бирæ алыхуызæн программæтæ. Ивгъуыд азы республикæйы хъæуты цæрджытæй 25 бинонтæн радих кодтой 25 милуан сомы, æмæ сын афтæмæй баххуыс кодтой социалон æгъдауæй.
