Уый тыххæй Цæгат Ирыстоны паддзахадон университеты студенттæн фехъусын кодта форумы директор Дмитрий Донецкий
Æрыгон активон адæм ацы аз бацархайдзысты фæсивæдон форум «Машук»-ы. Уый тыххæй Цæгат Ирыстоны паддзахадон университеты студенттæн фехъусын кодта форумы директор Дмитрий Донецкий. Стыр æргом аздæхта форумы ахуырадон хаймæ. Кæд-иу раздæр лæппутæ æмæ чызджытæ сæ проекттимæ, фыццаджыдæр, цыдысты гранттæ райсыны тыххæй, уæд сын ныр та форум фадат ратдзæн практикон зонындзинæдтæ алы къабæзты райсынæн. Ацы аз фæсивæдон форум «Машук»-ы уыдзæн 3 фæлтæры. Уый баст у, йæ архайджыты нымæц зынгæ кæй фæфылдæр, уыимæ. Пятигорскы уыдзæн 3 мин адæймагæй фылдæр. Лекцитæ æмæ дæсныйадæвдисæг ахуыртæ сын кæсдзысты Уæрæсейы хицауады бæрнон кусджытæ, æхсæнадон архайджытæ, наукæйы æмæ аивады ирддæр минæвæрттæ. Грантты фонд дæр фæфылдæр. Фыццаг хатт йæ бæрц уыдзæн 115 милуаны æмæ 500 мин сомы.
