10 азмæ дыккаг хатт æрвыст æрцыдысты уæлдæфон-десантон æфсæдтæм
Цæгат Ирыстоны сиддонты кадджын уавæры арвыстой æфсадмæ. 10 азмæ дыккаг хатт æрвыст æрцыдысты уæлдæфон-десантон æфсæдтæм. Ахæм фадат фæци 17 лæппуйæн. Фидæны салдæттæ уал уый размæ цæттæдзинад райстой ДОСААФы республикон хайады. Тренертæ сын бацамыдтой парашютимæ гæпп кæнын, къуххæстæй хæцын, æмæ машинæ скъæрын. Лæппуты афæндараст кодтой Дзæуджыхъæуы Намысы Аллеяйæ. Сиддонтæ æмæ ветерантæ дидинджытæ сæвæрдтой десантон æфсæдты бындурæвæрæг, æфсады инæлар Василий Маргеловы цыртдзæвæныл. Дзæуджыхъæуы æфсæддон комиссар Беджызаты Роберт куыд загъта, афтæмæй фæсивæды æвзæрстой цалдæр домæнмæ гæсгæ. Сæйрагдæр уыд – се спортивон цæттæдзинад æмæ психологон уавæр. Уæвгæ, æфсады службæ кæнын ныртæккæ бирæты фæнды, фæлæ ацы дæлхайдмæ бахаудысты æрмæстдæр, ДОСААФы цæттæ чи кодта, уыдон. Уæлдæфон-десантон æфсæдты кусджытæ æххæст кæнынц уæззау хæстæ. Уымæн та хъæуынц фидар лæппутæ. Ахæмтыл нымад æрцыдысты цæгатирыстойнæгтæ дæр. Æмæ ныр службæ кæндзысты Новороссийскы.
