Ацы хатт æргом æмæ бæстон ныхас кодта Елхоты æмæ Комсомольскæйы хъæуты цæрджытимæ
Цæгат Ирыстоны Сæргълæууæг Битарты Вячеслав радон хатт фембæлд Кировы районы минæвæрттимæ. Ацы хатт æргом æмæ бæстон ныхас кодта Елхоты æмæ Комсомольскæйы хъæуты цæрджытимæ. Фембæлд арæзт æрцыд Елхоты культурæйы Хæдзары. Цæмæй тыхсынц ацы хъæуты цæрæг адæм, æмæ сын цы зæрдæ æвæры нæ республикæйы разамынд, уый тыххæй радзурдзæн Касаты Наирæ.
Куыст, ахуыр, фæсивæдæн ирхæфсæн мадзæлттæ. Кировы районы цæрджытæ цы фарстатæ лæвæрдтой, уыдон актуалон сты æппæт республикæйæн дæр. Елхоты Битарты Вячеславимæ фембæлды рæстæг адæм дзырдтой сæ риссагдæр фарстатыл. Сæйрагдæр та уый, æмæ районы рынчындоны сæхгæнынмæ хъавынц, зæгъгæ. Фæлæ Сæргълæууæг уыцы информаци растыл нæ банымадта, загъта, мæнг хъусынгæнинаг кæй у, уый. Уыцы рæстæг ма фехъусын кодта тагъд рæстæджы санавиаци кæй скусдзæн, уый дæр. Ныридæгæн вертолетæн цæттæ кæнынц сæрмагонд фæз. Уый ахъаз удзæни зæрдæйы æмæ тугдадзинты низтæй рынчын адæмы цард фервæзын кæнынæн. Ахæм практикæ ис æппæт дунейы. Ам ахсджиаг у, ма байрæджы кæнын.
Кировы районы цæрджыты базонын фæндыди, Фыдыбæстæйы Стыр хæсты уæлахизы 75 азы бонмæ цæттæгæнæн мадзæлттæ куыд цæуынц, уый. Комсомольскæйы астæуккаг скъолайы директор ацы фарста радта Сæргълæууæгмæ. Ацы хъæуæй уæлахизыл тох кодта 89 адæймаджы. Сæ номыл цы æфсымæрон ингæн ис, уымæ хъæуы базилын, уæлдайдæр та юбилейон азмæ.
Битарты Вячеслав зæрдæ бавæрдта, сывæллæтты рæвдауæндæтты бынæттæ кæй нæ фаг кæны, уыцы фарстайыл бакусынæй. Ныр хъуыддаг алыг кæнæн уыдзæни æнцондæрæй. Уымæн æххуыс уыдзæни, республикæйы нацон проект «Ахуырад» æххæстгонд кæй цæуы, уый.
Битарты Вячеславимæ фембæлдтытæ цæрджытимæ цæуынц æнæхъæн афæдз. Æрмæст Кировы районы республикæйы разамонæг уыди æртыккаг хатт. Адæмы хъуыдымæ гæсгæ ахæм фембæлдтытæ сты тынг хъæугæ. Уымæн æмæ дзы æвæстиатæй лыггонд æрцæуынц бирæ фарстатæ.
Фæлæ бирæ хъуыддæгтæ аразгæ вæййынц адæмæй сæхицæй. Хъæуы æрмæстдæр хъæппæрис равдисын, æмæ æдæрсгæйæ исты хъуыддаджы сæр æрлæууын. Кусын кæй фæнды, уæлдайдæр та зæххы куыст кæнын, уыдонæн та æххуыс уыдзæни.
