Уæдæ се вæрæн хастой Уæрæсейы империйы æппæт быцæуты дæр
Нæ бæстæйы историйы ирыстойнаг æфсæддонтæ кæддæриддæр æвдыстой стыр хъæбатырдзинад æмæ архайдтой алыхуызон хæстон цауты. Уæдæ се вæрæн хастой Уæрæсейы империйы æппæт быцæуты дæр. Се хсæн Фыццаг дунеон хæсты. Лоттиты Игоры нывты равдыст дæр баст у Романовты хæдзары конвойы ирон адæмæй чи службæ кодта, уыдонимæ. Равдыст арæзт æрцыд Федерацийы Советы, хъусын кæны Мæскуыйы ирон æхсæнады официалон сайты. Пленарон æмбырды размæ историон равдыст бабæрæг кодта Уæрæсейы Федерацийы Советы сæрдар Валентина Матвиенко. Банымадта йæ тынг цымыдисагыл. Куыд ын радзырдтой, афтæмæй бирæ ирæттæ систы бæрзонд инæларон цинты аккаг. Æртæ императоры æмæ паддзахы фырт Алексей дæр уыдысты конвойы уæнгтæ. Нывты автор куыд радзырдта, афтæмæй йæ равдыст схонæн ис стыр наукон куыстæй, канд нывкæнынады равдыстæй нæ, фæлæ. Уымæн æмæ бирæ рæстæг куыста Ирыстоны æмæ Мæскуыйы архивты æмæ музейты фондты. Историон сурæттæ æмæ æфсæддон уæлæдарæсы сусæгдзинæдтæ æмбырд кодта тынг бæлвырд. Ацы хъуыддагыл схардз кодта 20 азы. Æмæ йыл ныр дæр кусы. Коллекцийы ис 100 протреты. Федерацийы Советы экспзицимæ рахастой æрмæстдæр йæ фæндзæм хай. Равдысты архайдтой хъæбатыр æфсæддонты фæдонтæ дæр. Семæ аныхас кодта Валентина Матвиенко. Уый раарфæ кодта авторæн æмæ уазджытæн, æмæ куыд загъта, афтæмæй Уæрæсейы тых æмæ хъару аразгæ у историйæн æмæ йын йæ хъайтартæн кад кæнгæйæ.
