Уыцы фадат сын фæци сæрмагонд программæ «Медицинæ»-йы фæрцы.
Цæгат Ирыстоны 8 æрыгон ахуыргæнæджы сæ фæлтæрддзинадыл бафтаудзысты Мæскуыйы, Санкт-Петербурджы, Иркутскы æмæ Рязаны хуыздæр медицинон куыстуæтты. Уыцы фадат сын фæци сæрмагонд программæ «Медицинæ»-йы фæрцы. Ууыл ныхас цыд республикæйы Проектон офисы радон æмбырды. Æрыгон специалистты равзæрстой Цæгат Ирыстоны æнæниздзинадхъахъхæнынады министрады къамисы уæнгтæ. Се ппæт дæр сты нæ республикæйы хирургтæ æмæ травматологтæ. Битарты Вячеслав райрæзты Агентады кусджытæн бабар кодта алы дохтырæн дæр хицæн, дæргъвæтин æмгъуыдмæ кусæг программæ саразын. Уым хъуамæ фыст уа бæлвырд ахуырады системæ, куыст ссарыны фæтк æмæ мызды фарстатæ. Ныртæккæ æнæниздзинадхъахъхъæнынады къабазæн дихгонд цæуынц стыр фæрæзтæ, уыимæ федералон бюджетæй дæр. Арæзт æмæ цалцæггонд цæуынц объекттæ, æлхæнынц кусæнгæрзтæ. Фæлæ æнæ фæлтæрдджын дохтыртæй уыцы хъуыддæгтæ афтæ ахадгæ не сты. Уымæ гæсгæ, фыццаджыдæр, хъæуы, нырыккон технологитæй æнтыстджынæй чи пайда кæндзæн, ахæм специалистты цæттæ кæнын, загъта Битарты Вячеслав. Æппæт хæрдзтæ республикæ исы йæхимæ. Ома æрыгон дохтырты ахуырадæн, алыхуызон конференциты æмæ профессионалон мадзæлтты архайынæн. Программæ «Медицинæ»-йы разамонæг Туаты Ирмæ куыд радзырдта, афтæмæй ног ахуыры аз ацы нысантæн бахъæудзæн 2 милуаны æмæ 30 мин сомы. Ныртæккæ куыст цæуы гæххæттытæ бацæттæ кæныныл.
