Проект «Хицауадимæ æргом ныхас» æххæст кæнгæйæ, Цæгат Ирыстоны культурæйы министр Къубалты Эльбрус дзуæппытæ радта журналистты фæрстытæн
Дæргъæвсы некрополь æрцæудзæн æхгæд туристтæн, Дигорайы та байгом кæндзысты ног культурон центр. Проект «Хицауадимæ æргом ныхас» æххæст кæнгæйæ, Цæгат Ирыстоны культурæйы министр Къубалты Эльбрус дзуæппытæ радта журналистты фæрстытæн. Цæуыл ма цыди ныхас, уый тыххæй радзурдзæн Гуытъиаты Алинæ.
Ведомствойы разамонæг радзырдта, национ проект Культурæ куыд æххæстгонд цæуы, уый тыххæй. Ацы аз министрад балæвæрдта 15 конкурсон курдиаты хъæуккаг клубтæ сцалцæг кæнынæн. Уыцы курдиæттæй фидаргонд æрцыдысты æхсæз.
Йæ тæмæны ис Национ музейы рацарæзты дыккаг къæпхæн. Кæд æмæ бæстыхайы цалцæггæнæн куыстытæ цæуынц, уæддæр культурæйы артдзæст йæ куыст дарддæр кæны. Министр журналисттæн радзырдта, цы ног уавæртæ дзы фæзындзæн, уыдоны тыххæй. Дзуапп дæтдзысты æппæт домæнтæн дæр. Сæйрагдæр та, музейы сæрмагонд æвæрæн кæй сараздзысты, уый. Йæ нысан уыдзæнис, музейы фонд бахъахъхъæнын.
Ведомствойы разамонæг радта хæслæвæрд национ музейы разамынд æмæ Стыр ныхасы фæсивæды комитетæн, цæмæй скæной Дæргъæвсы уæлмæрдты дарддæры куысты фæтк. Министр куыд бафиппайдта, афтæмæй уыцы бæстыхайы хъæуы ныффидар кæнын, уæлмæрдты хи куыд дарын хъæуы, уый тыххæй уагæвæрд.
Культурæйы министрад æнгом æмгуыстад кæны районтимæ. Стыр æргом здæхт цæуы адæмон сфæлдыстады райрæзтмæ. Уымæй уæлдай кусы æнæкоммерцион куыстуæттæн сфæлдыстадон проекттæн субсидитæ радих кæныны программæ.
