Архайынц дзы, нырыккон технологитæм хорз чи арæхсы, ахæм æрыгон адæм.
Цæгат Ирыстоны паддзахадон университеты кусын райдыдта информацион технологиты проект «Цифровой прорыв». Архайынц дзы, нырыккон технологитæм хорз чи арæхсы, ахæм æрыгон адæм. Йæ сæйраг хæс у – фидæны специалисттæн сæ проекттæ куыстуæтты разамонджытæн равдисын, æмæ гранттæ рамбулын. Технологон проекты æрдæгфиналы хатдзæгты тыххæй бæлвырддæр радзурæн Къутæрты Аидæ.
Цæгат Ирыстоны паддзахадон университет æрæмбырд кодта нырыккон технологиты дæсныты. Се ‘хсæн программисттæ, дизайнертæ æмæ разамонджытæ. Уыдон кусынц æнæниздзинадхъахъæнынады æмæ паддзахадон управленийы номинациты. Ацы егъау информацион технологиты проект «Цифровой прорыв» – зæгъæ, кæй хонынц, уым архайынц нæ республикæйы æмæ Кæсæг-Балхъары минæвæрттæ.
Командæты архайджытæн дæттынц 36 сахаты, цæмæй æрхъуыды кæной, æцæгæйдæр технологон æнтыстдзинад кæй ис схонæн, ахæм уынаффæ. Цы хæслæвæрдтæ сын дæттынц, уыдон та дзуапп дæттынц нæ бæстæйы райрæзты сæйрагдæр къабæзтæн. Уыдонмæ хауынц национ проекттæ дæр. Хицауады сæрдар Тускъаты Таймуразы ныхæстæм гæсгæ, ахæм проекттæ æрыгон адæмæн стыр ахъаз сты.
Конкурс «Цифровой прорыв» йæ куыст кæнын райдыдта 3 апрелы. Æрдæгфиналы райдианмæ сæ проекттæ балæвæрдтой авд сæдæ мин адæймаджы. Уыдонæн сæ 40 проценты бауагътой цалдæр хакатоны кæй хонынц, уыдонмæ. Ерысы координатор Артем Поповы ныхæстæм гæсгæ, алы архайæг дæр йæ проектыл бæстон куыст кæны.
Ерыс цæуы Цæгат Ирыстоны паддзахадон университеты. Ректор Огъуаты Алан куыд бафиппайдта, афтæмæй университет кæддæриддæр архайдта, цæмæй бацæттæ кæна дæсны специалистты. Стæй сын, уымæй уæлдай, хорз ахъаз уа ахуыр куы фæуой, уæд куыст ссарынмæ. Уыцы фадат та сын дæтты хакатон.
Фæстаг къæпхæн ацæудзæн Хъазаны. Уым сæ тыхтæ бавзардзысты 2000 хуыздæр специалисты нæ бæстæйы алы регионтæй. Хатдзæгтæм гæсгæ, архайджытæн фадат уыдзæн Уæрæсейы хуыздæр компаниты кусынæн, стæй уымæй уæлдай æхцайы фæрæзтæ райсынæн.
