Уый у горæты инвестицион программæйы иу хай.
Горæты цæрджыты æдасдзинады мадзæлттæ æххæстгæнгæйæ, Дзæуджыхъæуы зæххыбынты фæндæгтæ цæуынц цалцæггонд. Уый у горæты инвестицион программæйы иу хай. Фыццаджыдæр цавæр хæстæ æххæст кæнынц подрядон организацитæ, уый тыххæй радзурдзæн Джыбызты Зæринæ.
Æнæхъæнæй ма цы æфсæйнаджы хæйттæ базад, уыдоныл дæр алыхуызон фыстытæ. Хæрзæрæджы дæр ма зæххы бынты цæуынæй зæрдæ радис, уыд ног цалцæггонд, алцы дæр дзы уыд адæймаджы æнцойдзинадæн. Ныр уавæр цæхгæр аивта. Кæд дзы камерæтæ сæвæрдтой, уæддæр чьизи къух адæм не фсæрмы кæнынц æнаккаг митæ кæнынмæ æмæ сæттынмæ. Зæххыбынты фæндагыл ахизын сеппæт адæм нал уæндыдысты.
Московскийы уынджы автостанцæмæ хæстæгдæр зæххыбынты цæуæн фæндаг сæхгæдтой цалцæг кæнынмæ. Куыстытæ хъуамæ фæуой иннæ аз, мартъийы. Цы æрмæджытæй пайда кæнынц, уыдон сты хъæрзхъæд, зынсæттæн. Бындурон цалцæг цæуы Кировы уынджы зæххыбынты цæуæн фæндаг дæр.
Сабырдзинады проспекты рдыгæй ныххизæн сцалцæг кодтой 4 азы размæ. Ныртæккæ та нысан кæнынц куыстытæ сентябрьмæ фæуын. Зæххы бын цы базарадон бынæттæ ис, уыдоны архайд та хъæуы аууонæй ракæнын. Ома се фтиаг æргомæй куыд æвдисой.
Зæххыбынты цæуæн фæндæгтæ цалцæггонд цæуынц горæты инвестицион программæмæ гæсгæ. Хауы хæрдзты ахсджиаг статьямæ, баст у горæты цæрджыты æдасдзинадимæ.
