Йæ сæйраг нысан уыд – «Электроцинчы» раздæры фæллойгæнджытæн ног куысты бынæттæ ссарынæн баххуыс кæнын
31-æм июлы Дзæуджыхъæуы арæзт æрцыд куысты бынæттæ армукъа. Йæ сæйраг нысан уыд – «Электроцинчы» раздæры фæллойгæнджытæн ног куысты бынæттæ ссарынæн баххуыс кæнын. Уæвгæ та Цæгат Ирыстоны куыст дæттыны комитетмæ сæ курдиæттæ балæвæрдтой 1070 æгуыст адæймаджы. Чи сæ æрлæууыд ног бынаты, æмæ цавæр куыст цæуы ныртæккæ, уый тыххæй радзурдзæн Фидараты Маринæ.
Анатолий Меркидонов æрæджы райдыдта куыстуат «Бавари»-йы электрикæй кусын. Йæ фыццаг ахуырадмæ гæсгæ у металлург. Раздæр та куыста Электроцинчы заводы. Куы йæ сæхгæдтой, уæдæй фæстæмæ Анатолий райдыта йæхицæн ног куыст агурын.
Ацы куыстуаты ма стажировкæ кæнынц Электроцинчы заводы раздæры дыууæ кусæджы. Металлургон заводы дыууæ æгуыст адæймаджы сæхимæ райстой чысыл арæзтадон компанийы. Йæ разамонæг у Уаниты Зауыр. 10 адæймаджы та ма ныр цæуынц сæрмагонд ахуырад.
Йæ кусджыты Уаниты Зауыр, стæй ма ноджыдæр 40 куыстуаты разамонæджы ссардтой куысты бынæтты армукъайы. Арæзт æрцыд 31-æм июлы. Армукъайы сæйраг нысан уыд сæрамгондæй Электроцинчы раздæры фæллойгæнджытæн баххуыс кæнын. Куыст дæттыны комитетмæ сæ курдиæттæ балæвæрдтой 1070 адæймаджы. Уыдонæй 934 сæ куыст сæхи фæндонмæ гæсгæ нæ ныууагътой. Фæлæ уал сæ ног бынæттæ ссардтой дыууын авдæй.
Алы куыстуæтты стажировкæ кæнынц «Электроцинчы» заводы раздæры 35 кусæджы. 18 адæймаджы ма сæм бафтдзæн сентябры. Æртын иуæй та ацæудзысты сæрмагонд ахуырадон курсытæ.
