Уæлдæр ахуыргæнæндоны куыд загътой, афтæмæй не студенттæ Уæрæсейы ацы змæлды сты фыццаг бынаты
Ацы аз 200 адæймагæй фылдæр кусынц Цæгат Кавказы хæххон металлургон институты арæзтадон отрядты. Уæлдæр ахуыргæнæндоны куыд загътой, афтæмæй не студенттæ Уæрæсейы ацы змæлды сты фыццаг бынаты. Сæ фæлтæрдзинадыл æфтауынц Новоангарскы куыстуæтты, «ЮжУралЗолото»-йы, Зæрæмæджы ГЭСы арæзтады. Æппæтæй стырдæр студентон отряд та – 130 адæймаджы фæллой кæнынц Норильскы. Сæ фылдæр сты хæххон, электромеханикон æмæ арæзтадон факультетты студенттæ. Ацы аз Уæрæсейы студентон отрядты змæлдæн у юбилейон, сæххæст ыл 60 азы. Уæвгæ та студентон отряд у хорз бындур фидæны профессионалтæн. Фадат дæтты теоретикон зонындзинæдтæ практикон æгъдауæй ныффидар кæнынæн. Ныртæккæ ирыстойнаг фæсивæды дыккаг фæлтæр кусынц Зæрæмæджы ГЭСы бассейны арæзтад фæуыныл. Уый фæстæ куыстытæм бавналдзæн студентты æртыккæгæм фæлтæр. Профессионалон зонындзинæдтæй дарддæр ма сын бафиддзысты æхца, фæйнæ 25 мин сомы.
